АҚШнинг Мичиган штатида яшовчи Кристин Дювал исмли аёл коронавирусга қарши эмланганлар ўртасида ўтказилган мукофотли лотереяда жекпот ютиб олди, деб хабар беради Esquire.
Аёлнинг маълум қилишича, ютуқ унинг оиласига «барча орзуларини» амалга ошириш имконини беради. Аёл қўлга киритган мукофотининг бир қисмини уч нафар фарзандининг коллеждаги ўқишига ва уйини таъмирлашга сарфлаш ниятида, қолган қисмини эса руҳий касалликлардан азият чекадиган инсонларни қўллаб-қувватловчи хизматларга хайрия қилади.
Мичиганда эмланганлар ўртасидаги лотерея ўйини июль ойида аҳолини оммавий равишда коронавирусга қарши вакцинациядан ўтишга жалб этиш учун ишга туширилган. Ҳар куни 50 минг доллардан пул мукофоти ўйналган, 12—17 ёш оралиғида эмланган ўқувчиларнинг тўққиз нафари тўрт йиллик таълим стипендиясини ютиб олган. Огайода истиқомат қилувчи аёл эса май ойида 1 миллион долларни қўлга киритганди.
Мичиган штати расмийларининг ҳисоб-китобларига кўра, ўйин аввалида 2,4 миллион киши рўйхатдан ўтган, стипендияга эга 105 минг юқори синф ўқувчиларига даъвогарлик қилган.
Таъкидланишича, Мичиганда 11 июлдан 7 августга қадар вакцинанинг биринчи фазасидан ўтган инсонлар сони кун сайин ортган.
Аввалроқ австралиялик эркак ҳаётидаги «энг яхши хато»ни амалга ошириб, миллионерга айлангани тўғрисида хабар берилганди.
Изоҳ (0)