Бугун,

  • USD 11095.31
  • RUB 173.84
  • EUR 10772.44

Ташаббус кўрсата олмайдиган, янги-янги ғояларни кўтариб чиқишга, ўзгариш қилишга интилиши бўлмаган раҳбарларга нисбатан жуда қаттиқ талаб ва чоралар бўлади. Бу ҳақда айни пайтда Президент Шавкат Мирзиёевнинг тадбиркорлар билан бўлиб ўтаётган очиқ мулоқотида сўз юритилди, дея хабар бермоқда «Дарё» мухбири.

«Бугун илк бор мутлақо янгича форматда – ‘очиқ мулоқот’ шаклида сизлар билан юзма-юз учрашиб, бизнес соҳасидаги муаммо ва масалалар ҳақида, батафсил гаплашиб олишга қарор қилдик. Хабарингиз бор, камбағалликни қисқартириш, ‘маҳаллабай’ ишлаб, жойларда ўсиш нуқталарини аниқлаш, ишсизликни камайтириш, аҳоли даромадларини ошириш бўйича, катта марраларни белгилаб олганмиз.

Бу борада, давлат идоралари ва хизмат кўрсатувчи барча ташкилотлар, тадбиркорлар билан ҳар куни яқин ҳамкорликда ишлашлари ва уларга амалий ёрдам кўрсатишлари шарт. Бугунги мулоқотга тайёргарлик даврида, кўплаб савол ва таклифлар тушгани сабабли, мурожаатларнинг қабул муддатини 1 августдан 10 августга қадар, яъни 10 кунга узайтиришга мажбур бўлдик», — дейди Президент.

Таъкидланишича, тадбиркорлардан 15 мингдан ортиқ савол, таклиф ва ташаббуслар келиб тушган, шу кунгача жойларда уларнинг кўпчилиги ҳал этилган.

«Айниқса, Андижон, Наманган ва Сурхондарёда ишлар тизимли ташкил қилиниб, тадбиркорларимизнинг 90 фоиз муаммолари қисқа фурсатларда ҳал қилиб берилгани, албатта, қувонарли ҳол. Қаерда муҳит яхши бўлса, ҳудуд ва тармоқ раҳбарлари Президент талабини тўғри тушунган бўлса, ўша ерда ишлаш услуби, тадбиркорларга муносабат ўзгарган.

Аксинча, тадбиркор дарди билан яшамаган, улар кўтарган муаммоларнинг ичига кирмасдан, кўмак бермаган раҳбарлар фаолиятига эса халқимизнинг ўзи баҳо беради ва бундай раҳбарларга бизнинг сафимизда ўрин йўқ ва келажакда ҳам шундай бўлади.

Бир нарсани барчамиз аниқ тушуниб олишимиз лозим. Тадбиркорларимизнинг ушбу мурожаатлари, амалдаги ислоҳотларимиз кўзгусидир. Шу боис, ҳар бир вазирлик ва идора раҳбари, вилоят, туман ва шаҳар ҳокимлари келиб тушган мурожаатларни ўзларининг фаолиятига баҳо деб билишлари, бундан тўғри хулоса чиқариб, кескин ўзгаришлар қилишлари зарур ва шарт.

Ташаббус кўрсата олмайдиган, янги-янги ғояларни кўтариб чиқишга, ўзгариш қилишга интилиши бўлмаган раҳбарларга нисбатан жуда қаттиқ талаб ва чоралар бўлади», дея таъкидлаган давлат раҳбари.

Аввалроқ Шавкат Мирзиёев тадбиркорлар билан учрашувга тайёргарликнинг бориши бўйича йиғилиш ўтказгани, Ўзбекистон Президенти билан бўладиган учрашувда тадбиркорларнинг қайси қатлами иштирок этиши ҳақида хабар берилганди.

Изоҳ
Асосий янгиликлар
Молия
Ўзбекистондаги энг фаол банклар рейтинги янгиланди. Нималар ўзгарди?
Маҳаллий
Давлетмурат Тажимуратов 16 йилга қамалди, журналист Лолагул Қаллиханова суд залидан озод қилинди 
Спорт
Фигурали учиш бўйича Ўзбекистоннинг 10 карра чемпиони Татьяна Малининанинг 18 ёшли ўғли АҚШ чемпионига айланди