O‘zbekistonning Afg‘oniston bilan davlat chegarasini qo‘riqlash va himoya qilish kuchaytirilgan tartibda olib borilmoqda. Bu haqda O‘zbekiston Tashqi ishlar vazirligi rasmiy vakili Yusup Kabuljonov 15-avgust kuni ma’lum qildi.
14-avgust kuni Afg‘oniston shimolidagi Mozori-Sharif shahri “Tolibon” nazorati ostiga o‘tgani ma’lum bo‘lgan. Shaharni deyarli jangsiz “Tolibon”larga topshirgan afg‘on mudofaa va xavfsizlik kuchlari O‘zbekiston bilan chegara tomon chekingan, Afg‘onistonni O‘zbekistonning Termiz shahri bilan bog‘lab turuvchi “Do‘stlik” ko‘prigi afg‘onistonliklar bilan to‘lgan. So‘nggi ma’lumotlarga ko‘ra, O‘zbekiston ularning 84 nafarini qabul qilgan.
TIV rasmiy vakili Yusup Kabuljonovning ma’lum qilishicha, 14-avgustda kun davomida Termiz—Mozori-Sharif temiryo‘l uchastkasida xizmat ko‘rsatuvchi O‘zbekiston fuqarolarini vatanga qaytarish tashkil etilgan. TIV rasmiysining bayonotida Afg‘onistonda qolayotgan bo‘lishi mumkin bo‘lgan boshqa o‘zbekistonliklar haqida ma’lumot berilmagan. Qayd etish joiz, 14-avgust kuni Kobuldan Toshkentga Afg‘onistondagi beqarorlik boshlanganidan beri eng katta aviareys kelgan edi.
Ta’kidlash joizki, davlat chegarasini qo‘riqlash va himoya qilish kuchaytirilgan tartibda olib borilmoqda, barcha zarur xavfsizlik choralari ko‘rilgan. Termizda xavfsizlik idoralari rahbarlari va davlat hokimiyati organlari vakillaridan iborat tezkor shtab joylashtirilgan, — deyiladi TIV rasmiy vakili Yusup Kabuljanovning axborotida.
Izoh (0)