Қозоғистонда COVID-ўлимлар бўйича антирекорд янгиланди, Нью-Йоркда эмланганлик гувоҳномасини талаб қилиш бошланади. Коронахабарлар

Жонс Ҳопкинс университети маълумотларига кўра, дунёда коронавирус билан касалланганлар сони 199 566 049 кишини ташкил қилмоқда, 4 245 640 киши вафот этган. COVID-19 билан касалланиш ҳолатлари сони бўйича АҚШ (35,2 миллион), Ҳиндистон (31,7 миллион), Бразилия (19,9 миллион), Россия (6,25 миллион) ва Франция (6,24 миллион) олдинда бормоқда.

Қозоғистонда коронавирус инфекцияси ва пневмониядан ўлим даражаси бўйича суткалик антирекорд қайд этилди.

2 август ҳолатига кўра, коронавирус тасдиқланган одамлар орасида ўлим ҳолатлари 124 тани ташкил қилди. Яна 25 киши манфий натижали ПЗР-тестга эга бўлган ҳолда пневмониядан вафот этди. Бир кун аввал COVID-19 ва пневмониядан вафот этганларнинг умумий сони 126 кишини ташкил этган эди.

Шунингдек, сўнгги бир кеча-кундузда 7519 кишида коронавирус ва пневмония аниқланган. Бир кун аввалги кўрсаткич 7481 тага тенг эди. Шу тариқа мамлакатда пандемия бошидан буён касалланганлар сони 602 952 кишига етди.

Нью-Йоркда ресторан ёки тренажёр залига киришда коронавирусга қарши эмланганликни тасдиқловчи ҳужжатни талаб қилиш бошланади.

«Агар жамият ҳаётида тўла-тўкис иштирок этмоқчи бўлсангиз, эмланишингиз керак. Ёпиқ ресторанлар ва тренажёр залларига, шунингдек, Нью-Йоркдаги ёпиқ биноларда ўтказилаётган концертлар ва томошаларга кириш учун сиз COVID-19’га қарши эмланганлигингизни тасдиқлашингиз керак бўлади. Бу шаҳримиз хавфсизлигини таъминлаш бўйича ўта муҳим талаб», — деб ёзди шаҳар мери Билл де Блазио Twitter’да.

Нью-Йоркда сўнгги бир кеча-кундузда 1288 кишида коронавирус аниқланган, 75 киши касалхонага ётқизилган.

Нью-Йорк АҚШда умумий овқатланиш муассасаларида вакцинацияни тасдиқловчи ҳужжат талаб қилинадиган биринчи шаҳарга айланди. Ушбу талаб 16 августдан кучга киради, 13 сентябрдан эса унинг бажарилишини шаҳар ҳукумати текширишни бошлайди.

Коронавирусга қарши тўлиқ эмланган ва туристик визаси бўлган шахслар энди мажбурий карантиндан ўтмаган ҳолда Саудия Арабистонига кириши мумкин.

Аммо бу «Спутник V» билан эмланганлар учун амал қилмайди: Саудия Арабистонида бу вакцина тан олинмаган. Фақат Oxford/AstraZeneca, Pfizer/BioNTech, Moderna ва Johnson & Johnson вакциналаридан бири билан эмланган саёҳатчиларгина мамлакатга киритилади.

Бундан ташқари, Sinopharm ёки Sinovac билан эмланган туристлар ҳам кириши мумкин, аммо улар қиролликда маъқулланган вакциналардан бири билан қўшимча битта доза олиши керак бўлади. Шунингдек, барча сайёҳларда 72 соат ичида олинган манфий натижали ПЗР-тест бўлиши керак.

Хитойда коронавирусга чалиниш бўйича янги ҳолатлар қайд этилди. Ҳукумат кўраётган профилактика чораларига қарамасдан, 3 август куни 96 кишида COVID-19 аниқланди, шуларнинг 25 нафари чет элдан кириб келган шахслар. Ўлим ҳолатлари қайд этилмаган.

Бир кун аввал (2 август) 61 кишида вирус аниқланган эди.

Касалланиш ҳолатлари Сзянсу, Хунан, Хубэй, Шандун, Юньнань, Хенан ва Фуцзян провинцияларида қайд этилган. Беморлар сонининг ўсишини экспертлар дельта штамм тарқалиши билан боғламоқда.

Мамлакат ичида инфекция тарқалиши бўйича биринчи ўринда Жуйли (Юньнань провинцияси), иккинчи ўринда эса Нанкин (Сзянсу провинцияси) шаҳарлари бормоқда. Жуйлида вирус июль ойида қўшни Мьянмадан ўтган бўлса, Нанкинда эса чет элдан етиб келган авиалайнерларни тозалаш билан шуғулланган аэропорт ходимлари вирус тарқатувчига айланди.