Афғонистонда мудофаа вазирининг уйига ҳужум уюштирилди. 4 киши ҳалок бўлди (видео)

Афғонистон пойтахти Кобулда 3 август куни кечқурун мудофаа вазири вазифасини бажарувчи Бисмилла Муҳаммадийнинг уйи яқинида аввалига портлаш содир этилди, сўнг отишма юз берди. Бу ҳақда Афғонистон хавфсизлик хизматидаги манбаларга таяниб, «ТАСС» хабар берди. 

Қайд этилишича, худкуш террорчи бошқаруви остидаги машина портлатилган. Шундан сўнг қуролланган одамлар (дастлабки маълумотларга кўра, тўрт киши) Муҳаммадийнинг уйига бостириб кириб, хавфсизлик кучлари билан отишма бошлаган.

Амалдорнинг уйига қилинган ҳужум тахминан тўрт соат давом этган. Натижада тўрт киши ҳалок бўлган, яна 20 киши жароҳатланган. Ҳодиса пайтида амалдор уйда бўлмаган, унинг оиласи эвакуация қилинган.

1ТВ телеканали, ўз навбатида, портлашдан кейин номаълум шахслар тинч аҳолининг уйларига ҳам бостириб кира бошлаганини хабар қилди.

Ҳозирча ҳеч бир жангари гуруҳ ҳужум учун жавобгарликни ўз зиммасига олмади. Шу билан бирга, АҚШ Давлат департаменти хабарига кўра, Кобулдаги мазкур портлашда сўнгги ҳафталарда содир бўлган «Толибон» ҳужумларига хос барча белгилар мавжуд.

Аввалроқ Кобулда Қурбон ҳайити муносабати билан намоз ўқилаётган вақтда президент саройи яқинига учта ракета келиб тушганди. Ҳайит намозида Афғонистон президенти Ашраф Ғани ҳам қатнашган. Портлашлардан кейин ҳайит намози тўхтатилган.

Айни пайтда Афғонистондан АҚШ қўшинларининг олиб чиқилиши фонида мамлакатда ҳукумат ва «Толибон» ўртасидаги зиддият кучайган.

Афғонистондан НАТО қўшинларини олиб чиқиш 29 апрелда бошланган, АҚШ ва «Толибон» ўртасида тузилган келишувга биноан жараён кузда якунланиши керак. Сўнгги маълумотларга кўра, АҚШ Афғонистондаги ҳарбий контингентининг 90 фоиздан кўпроғини олиб чиқиб кетди.

Афғонистон президентининг фикрича, АҚШ қўшинларининг ўта кескинлик билан олиб кетилиши мамлакатда вазиятнинг ёмонлашишига олиб келди.