Afg‘oniston poytaxti Kobulda 3-avgust kuni kechqurun mudofaa vaziri vazifasini bajaruvchi Bismilla Muhammadiyning uyi yaqinida avvaliga portlash sodir etildi, so‘ng otishma yuz berdi. Bu haqda Afg‘oniston xavfsizlik xizmatidagi manbalarga tayanib, “TASS” xabar berdi.
Qayd etilishicha, xudkush terrorchi boshqaruvi ostidagi mashina portlatilgan. Shundan so‘ng qurollangan odamlar (dastlabki ma’lumotlarga ko‘ra, to‘rt kishi) Muhammadiyning uyiga bostirib kirib, xavfsizlik kuchlari bilan otishma boshlagan.
Amaldorning uyiga qilingan hujum taxminan to‘rt soat davom etgan. Natijada to‘rt kishi halok bo‘lgan, yana 20 kishi jarohatlangan. Hodisa paytida amaldor uyda bo‘lmagan, uning oilasi evakuatsiya qilingan.
1TV telekanali, o‘z navbatida, portlashdan keyin noma’lum shaxslar tinch aholining uylariga ham bostirib kira boshlaganini xabar qildi.
Hozircha hech bir jangari guruh hujum uchun javobgarlikni o‘z zimmasiga olmadi. Shu bilan birga, AQSh Davlat departamenti xabariga ko‘ra, Kobuldagi mazkur portlashda so‘nggi haftalarda sodir bo‘lgan “Tolibon” hujumlariga xos barcha belgilar mavjud.
Avvalroq Kobulda Qurbon hayiti munosabati bilan namoz o‘qilayotgan vaqtda prezident saroyi yaqiniga uchta raketa kelib tushgandi. Hayit namozida Afg‘oniston prezidenti Ashraf G‘ani ham qatnashgan. Portlashlardan keyin hayit namozi to‘xtatilgan.
Ayni paytda Afg‘onistondan AQSh qo‘shinlarining olib chiqilishi fonida mamlakatda hukumat va “Tolibon” o‘rtasidagi ziddiyat kuchaygan.
Afg‘onistondan NATO qo‘shinlarini olib chiqish 29-aprelda boshlangan, AQSh va “Tolibon” o‘rtasida tuzilgan kelishuvga binoan jarayon kuzda yakunlanishi kerak. So‘nggi ma’lumotlarga ko‘ra, AQSh Afg‘onistondagi harbiy kontingentining 90 foizdan ko‘prog‘ini olib chiqib ketdi.
Afg‘oniston prezidentining fikricha, AQSh qo‘shinlarining o‘ta keskinlik bilan olib ketilishi mamlakatda vaziyatning yomonlashishiga olib keldi.
Izoh (0)