Сингапур ЖССТнинг узоқ умр кўриш бўйича етакчи бўлган топ-5 мамлакатларнинг 2020 йилдаги рўйхатидан ўрин олган. Биринчи ўринга Япония (ўртача умр кўриш давомийлиги 84,5 ёш), иккинчи ўринга Швейцария (84 ёш) ва учинчи ўринга Корея лойиқ деб топилган. Сингапур ва Испания эса кейинги ўринларни эгаллаган. Ушбу мамлакатлардаги ўртача умр кўриш давомийлиги 83,3 ёш ҳисобланади. Сингапурликларнинг бу натижага эришиши сабаби нимада экани ҳақида маълумот бериб ўтамиз.
Овқатланиш
Сингапур дунёда миллий таомларининг сифати бўйича Япониядан кейинги ўринда туради. Сингапур ошхонаси — мамлакатда истиқомат қиладиган турли миллат вакилларининг анъанавий таомлари умумлашмасидан ташкил топган. У ерда сиз Хитой, Малайзия ва Индонезия ошхонасига мансуб таомлар, шунингдек, ҳинд ва инглиз овқатларини ҳам топишингиз мумкин. Гуруч сингапурликлар ратционидаги энг асосий маҳсулотлардан бири ҳисобланади. Аҳолининг таомномасидан бундан ташқари сабзавот, тропик мевалари, денгиз маҳсулотлари ўрин олади. Деярли ҳар бир таомнинг рамзий маъноси борлиги Сингапур ошхонасига Хитойникидан ўтган. Масалан: лапша — узоқ умр кўриш, устрица — омад, балиқ — равнақ топишнинг рамзи эканига ишонади.
Сингапур ошхонаси мамлакат шаҳарларида истиқомат қиладиган турли халқларни бирлаштирувчи бошланғич нуқта эканига ишонтиради. Ташриф буюрган сайёҳ, таомлар барра ва сифатли маҳсулотлардан тайёрланишига гувоҳ бўлади. Таомни хўрандалар хоҳишидан келиб чиққан ҳолда ўзи пишириши имконияти мавжуд бўлган ресторанлар кенг тарқалган. Сингапурликлар овқат ҳақида кўп гапиришига қарамай, ортиқча вазндан азият чекадиганлар сони аҳолининг атиги 1,8 фоизини ташкил қилади.
Фитнес-клуб ва боғлар
Фаол турмуш тарзи ва спорт билан шуғулланишни канда қилмаслик яна бир эътиборга молик жиҳат саналади. Аксарият одамлар фитнесс-клубга қатнайди, ёки боғларнинг ўзида машқ бажаради. Деярли ҳар бир кондоминиум ҳовуз, машғулот зали ва теннис кортини ўз ичига олади. Айримларида эса сквош (ёпиқ жойда ракетка ва топ билан ўйналадиган ўйин спорт тури) учун хусусий кортлар ва мини-голф учун майдонлар мавжуд. Нафақат ёшлар, балки нафақахўрлар ҳам фаол ҳаёт кечиради: улар учун савдо марказлари ва боғларда бепул оммавий машғулотлар ташкил қилинади, кондоминиумларда эса ёши олтмишдан ошган инсонлар рақс билан шуғулланади.
Чекиш ва ичиш қимматга тушади
Сингапурда сигарет ва спиртли ичимликларнинг нархидан ташқари, уларга тўланадиган солиқ ҳам бошқа мамлакатларга нисбатан қимматроқ. Айнан шу сабаб ҳам кўпчилик зарарли одатларга ўрганиб қолишдан азият чекмайди.
Сингапурликлар меҳнат қилишдан қочмайди
Аҳолининг деярли барчаси меҳнатсевар. Мамлакатда интеллектуал салоҳияти юқори ва тажрибали профессионаллар қадрланади, тажрибага эга бўлиш учун эса кўп ишлаш ҳамда амалиёт ўташ муҳим саналади. Расман тонгги 8:00 дан бошланадиган иш вақти кечки 18:00 да тугашига қарамай, ишчилар кўпинча офисда узоқ вақт қолиб кетади.
Фен-шуй
Сингапур Хитойнинг фен-шуй фалсафаси (Бундай шаҳарларда қурилиш чизиқларида умумий услуб ва уйғунликни сақлаш муҳим саналади) тамойиллари асосида барпо этилган. Ҳар бир бино, боғ, йўллар, умумий овқатланиш ерлари, умуман олганда ҳамма-ҳамма нарса фен-шуй усталари маслаҳатига биноан уйғун қилиб қурилган. Масалан «Сити-сентер» мажмуасида қад кўтарган ҳар бир бино баландлиги одамнинг қўлидаги бармоқларни, фавворадаги сув эса пулнинг рамзи ҳисобланади..
Йил давомида иссиқ ҳарорат
Ҳаво ҳароратининг кескин ўзгариши саломатлик, хусусан, юрак-қон томир тизими учун зарарли ҳисобланади. Сингапурда эса йил давомида ёз фасли ҳукм суради. Ўртача 24-30 даражада иссиқ бўлади. Ўзгаришлар эса кузатилмайди.
Хавфсизлик ва сокинлик
Дунёнинг энг хавфсиз мамлакатлари рўйхатидан ўрин олган Сингапурда, жиноятлар сони кам, қурол ва гиёҳванд моддалар эса тақиқланган. Тинчлик ва мустаҳкам асаб тизими эса саломатликнинг гарови ҳисобланади.
Сифатли тиббиёт
Сингапур дунёдаги энг яхши соғлиқни сақлаш тизимига эга мамлакатлардан бири саналади. У ердаги ҳамма нарса аҳоли саломатлигини сақлаш учун хизмат қилади. Мамлакатда ривожланаётган касалликни даволашдан кўра, профилактик тиббиёт ёрдамида олдини олиш афзал билинади. Айнан шу ёндашув сабаб Сингапур, аҳолиси энг узоқ умр кўрувчи бешталикдан ўрин олган бўлишига шубҳа йўқ.
Изоҳ (0)