Мукаммал ташқи кўриниш, гўзаллик ва терининг саломатлиги нафақат ирсият ҳамда атроф-муҳит, балки кун давомида бажариладиган одатлар билан ҳам боғлиқ бўлади.
Қуёшдан ҳимояловчи кремдан мунтазам равишда фойдаланмаслик
Онкологларнинг фикрича, ҳар бешинчи одамда тери саратонининг пайдо бўлиш хавфи бўлади. Қуёшнинг ультрабинафша нурлари эса ушбу касалликнинг ривожланиш хавфини оширувчи асосий омиллардан бири саналади. Ҳатто булутли ҳавода ҳам 80 фоизгача бўлган ультрабинафша нурлар терига таъсир қилиши мумкинлиги сабаб ҳам доимий равишда ҳимояланиб юришни канда қилмаслик керак. Шуни инобатга олинг ва ҳар сафар кўчага чиқишдан аввал SPF-крем билан ҳимояланинг. Шунингдек, қуёш нуридан ҳимоя қилувчи кўзойнакдан фойдаланишни унутманг.
Терини губка ёки мочалка билан тозалаш
Ювиниш кунлик гигиенага амал қилишнинг муҳим қисми ҳисобланади, юз терисини эса декоратив косметик воситалардан фойдаланмаган тақдирда ҳам кечаси ва эрталаб тозалаб туриш керак бўлади. Аммо бу борада асло ювиниш учун мўлжалланган губка ёки мочалкадан фойдаланманг. Бундай воситалар юзга шикаст етказиши, шунингдек, терининг табиий ёғ қатламини йўқ бўлишига ҳисса қўшиб, эрта қаришга олиб келиши мумкин.
Совундан фойдаланиш
Совун таркибидаги pH’нинг юқори миқдори терининг табиий ёғланишига таъсир қилиб, табиий ҳимояни кетказиши мумкин. Бундай маҳсулот терини шикастлаши мумкинлиги туфайли ҳам pH миқдори у қадар кўп бўлмаган совунларни харид қилиш тавсия қилинади.
Терини доимий равишда намлантирмаслик
Мунтазам равишда намлантиришга нафақат қуруқ, балки аралаш ва ёғли тери ҳам эҳтиёж сезади. Бу борада терини намлантириш билан бирга парваришлайдиган крем, маз ва ёғларга эътибор қаратиш тавсия қилинади. Қолаверса, бу каби маҳсулотлар терини шикастланишдан сақлаб, бактерия ҳамда хавфли инфекцияларни у орқали организмга киришидан ҳимоя қилади.
Қўл телефонини тозалаб турмаслик
Хавфли микроблар мобил телефонингизда, жамоат ҳожатхонаси эшиги ва унитаздагидан кўпроқ тўпланган бўлиши мумкин. Фойдаланиш давомида тери ва нафас аъзоларига яқин тутилгани сабаб ҳам уни ўз вақтида дезинфекцияловчи салфетка билан артиб туриш керак. Шифокорлар тозалашни ҳафта давомида камида бир марта амалга оширишни тавсия қилади.
Шакарни ҳаддан ортиқ даражада кўп истеъмол қилиш
Шакарни кўп истеъмол қилиш тери аҳволига салбий таъсир қилиши мумкин. Гап шундаки, шакар молекуласининг теридаги оқсил билан бирикиши терининг таранг ва эластиклигига жавоб берадиган толаларнинг шикастланишига олиб келиши мумкин.
Кам ухлаш
Уйқу давомида организмдаги барча тизим, хусусан терида ҳам янгиланиш бўлгани боис тиниқиб дам олмаслик юзда акс этмай қолмайди. Кам ухлаганда тери ўлик ҳужайралардан қутулишга улгурмайди. Тадқиқотларда кечаси етарлича тиниқиб ухлайдиган аёлларнинг икки карра секинроқ қариши аниқланган.
Изоҳ (0)