Хитой, Амирликлар, АҚШ… Иштиёқини йўқотган футболчилар шу мамлакатларга кетади. У ерда футбол даражаси паст бўлса ҳам, яхши маош тўланади. Кимдир фаолияти сўнгида у ерга боради, кимдир эса фаолиятининг энг юқори нуқтасида. Қуйида Европани эрта тарк этган 8 футболчи ҳақида ҳикоя қилинади.

8. Антони Модест — 33 ёш. Хитой (2016-2017)

Фото: Getty Images

XXI асрнинг 10 йилларида Антони Модест «Кёльн» жамоаси мухлисларининг севимли футболчиси эди. Ҳужумчи фаолияти бошида «Ницца», «Анже», «Бордо» ва «Бастия» жамоаларида тўп суриб, ўртача натижа қайд этган. 2013 йилда Антони Германиянинг «Ҳоффенҳайм» жамоасига ўтди. У ерда ҳам ўртача ўйин намойиш этган футболчига «Кёльн» қизиқиш билдирди. Модест у ерда порлади. 2 мавсумда 68 та ўйинда иштирок этиб, 40 та гол урди. Жамоа мухлислари ниҳоят ажойиб футболчига эга бўлганидан жуда хурсанд эди. Лекин бойвачча хитойликлар келди ва ҳужумчини ўзларининг чемпионатига олиб кетди. Хитойда 2 мавсум тўп сурган француз футболчиси яна «Кёльн»га қайтди. Бу сафар у аввалги Антони эмасди: 2 йилда 10 та ўйинда иштирок этди. Хитой футболчининг муваффақиятли фаолиятига нуқта қўйиши мумкинлигининг яққол исботи.

7. Рамирес — 34 ёш. Хитой (2016—2019)

Фото: Getty Images

Бразилиялик — ўнинчи йилларнинг биринчи ярмида таянч зонанинг эталонларидан бири эди. 2010 йилда «Челси» Рамиресни харид қилди. «Аристократлар» сафида футболчи қўлга киритиш мумкин бўлган барча совринларни, шу жумладан, 2012 йилда Чемпионлар Лигасини ҳам ютди, Бразилия терма жамоасидан чақирув олди. Лекин 28 ёшида Рамирес Хитойдан таклиф олади ва у ерга кетишга қарор қилади. Хитойдаги 2 мавсумидан сўнг ярим ҳимоячи жамоасиз қолади. 2019 йилда «Палмейрас» футболчига бошпана беришга рози бўлади. Рамирес ўз юртида Либертадорес Кубогини қўлга киритади, лекин Бразилиядаги 3 йил доимий захирадан майдонга тушишлар, кам ўйин амалиёти билан ёдда қолди. 34 ёшли Рамирес ҳеч кимга керак бўлмай қолди ва ҳозирда эркин агентга айланган.

6. Янник Карраско — 27 ёш. Хитой (2018-2019)

Фото: Гетттй Images

Фаолиятининг илк йилларида Янник Феррейра Карраско «Монако»да ажойиб ўйин намойиш этди. Франциядаги уч мавсуми мобайнида бельгиялик иқтидор эгаси асосий таркиб футболчисига айланди. Диего Симеоне футболчини «Атлетико Мадрид»га ўтишга кўндиради. Карраско Мадрид жамоасида қанотда ҳаракат қилди ва алмаштириб бўлмас футболчига айланди. 2018 йилда хитойликлар футболчига таклиф билан чиқди ва Янник Жаҳон Чемпионатидан аввалроқ уларнинг таклифини қабул қилди. «Дальян Про»да ҳам кучли футбол намойиш этган Карраско раҳбарият билан низолашиб қолади ва иккинчи мавсумининг охирида Хитойни тарк этиб, «Атлетико»га қайтади. Янник 2020/21 йилги мавсумда «Атлетико» сафида чемпионга айланди ва гол+пас тизимида 16 очко жамғарди. Карраско ўз вақтида Хитойдан кета олди.

5. Халк — 34 ёш. Япония (2005—2008), Хитой (2016—2020)

Фото: Getty Images

Халк — ноёб футболчи. Бразилиялик фаолиятини Японияда бошлаган. У ердаги муваффақиятли фаолиятидан сўнг «Порту»га ўтган. Португалия жамоаси сафида бутун дунё унинг узоқдан берадиган кучли зарбаларини томоша қилди. Терма жамоадан чақирув олган Халк энди «Ливерпуль» ёки «Барселона»га ўтиши кутилганди. Аммо футболчи Россиянинг «Зенит» жамоасини танлади. Санкт-Петербургликлар сафида омадли фаолият олиб бораётган Халк хитойликлар назарига тушади. Халк ўйлаб ўтирмасдан Хитойга йўл олади. Осиёда фаолияти кўнгилдагидек ўтмаган футболчи 2021 йилда Бразилияга қайтади. «Атлетико Минейро» аъзоси бўлган Халк топ-5 чемпионатларидан бирортасида ўйнамади. Шунга қарамасдан қайси жамоада тўп сурган бўлса, ўша жамоа афсонасига айлана олди.

4. Карлос Вела — 32 ёш. АҚШ (2018 йилдан ҳозиргача)

Фото: Getty Images

Карлос Велани Жанубий Америкада порлади деб айтиб бўлмайди. Вела ноёб иқтидор эгаси эди ва бу унинг 2008 йилда «Арсенал» сафига ўтишига замин яратди. АПЛда унга осон бўлгани йўқ, мексикалик футболчи чемпионат танлашда адашганди. Бешафқат ва кучли Англия Премьер Лигаси Карлосга ўзининг салоҳиятларини кўрсатишга йўл қўймади. Англиядаги 3 йиллик фаолиятидан сўнг Вела Испанияга кетишга мажбур бўлди. «Реал Сосьедад»даги илк мавсумидаёқ Карлос асосий таркиб футболчисига айланди ва гол+пас тизимида 20 очко тўплашга муваффақ бўлди. Вела жамоани олдинга бошларди ва асосий юлдузга айланди. «Сосьедад»даги 6 йиллик фаолиятидан сўнг Карлос MLS’га ўтди. «Лос-Анжелес» сафида ҳам Карлос Вела етакчига айланди. Ҳозирда 32 ёшда бўлган Вела бошқа жамоага ўтиш ҳақида ўйлаётгани йўқ.

3. Себастьян Жовинко — 34 ёш. MLS (2015—2018), Саудия Арабистони (2018 йилдан ҳозиргача)

Фото: Getty Images

«Эмполи»даги ажойиб ўйинлари Себастьян Жовинконинг «Ювентус»га ўтишига сабабчи бўлди. Туринда Себастьяннинг ишлари юришмади, жамоа даражаси у учун юқорилик қилди. Шунинг учун 2010 йилда футболчи «Парма»га ўтди. А Сериянинг ўртамиёна жамоасида Жовинконинг ўйини очилиб кетди: 70 ўйинда 40 голли вазиятларда қатнашди. Жамоа мухлислари футболчини яхши кўрарди ва ҳеч қаерга кетишини истамасди. Аммо «кекса синьора» Жовинкони қайтариб олишни хоҳлаб қолди. Шу тариқа Себастьян 2012 йилда «Ювентус» сафига қайтди. 2015 йилда эса MLS’га йўл олишга қарор қилди. «Торонто» сафида фаолият олиб борган футболчи 2018 йилда шартномаси якунига етгач, Саудия Арабистонининг «Ал-Ҳилол» жамоасига бориб қўшилди. Себастьян Жовинконинг Италияга қайтиши борасидаги миш-мишлар тинмаяпти, аммо бунга ишониш қийин.

2. Алекс Тейшейра — 31 ёш. Хитой (2016—2020)

Фото: Getty Images

Тейшейра Донецкнинг «Шахтёр» жамоасига ёшлигиданоқ қўшилганди. Украина жамоаси ўша вақтларда ҳам бразилиялик футболчиларни харид қилиб, уларни катта нархларга сотиш билан шуғулланарди. Фернандиньо, Дуглас Коста, Виллиан, Луис Адриано каби футболчилар шулар жумласидан. 2015/16 йилги мавсумда «Ливерпуль» Тейшейрани харид қилиш учун «Шахтёр» билан боғланади. Аммо Алекс негадир бу таклифга эътибор қилмасди. Бунга эса сабаб бор эди. 2016 йилда хитойликлар «Шахтёр»га жуда катта пул тўлайди ва футболчининг ўзини ҳам «рози қилади». Алекс Хитойга кетишга қарор қилади. 2020 йилда эса шартномаси якунига етган футболчи эркин агентга айланди ва ҳозирча ҳеч ким «Цзянсу Сунин» таклиф қилганчалик шартнома таклиф қилмаяпти.

1. Оскар — 29 ёш. Хитой (2017 йилдан ҳозиргача)

Фото: Getty Images

Оскар «Челси» сафида порлаган бразилиялик футболчилардан бири. У Чемпионлар Лигасида дебют ўйинидаёқ «Ювентус» дарвозасига иккита гол уриб, ЕЧЛ тарихида дублга эришган энг ёш футболчига айланган эди. Бразилия терма жамоаси ва «Челси»нинг асосий таркиби вакили футбол учун идеал ёшида Хитойга кетди. «Шанхай СИПГ» унинг кейинги жамоасига айланди. Хитойда унинг фаолияти турғун ҳолатда кечди. Ҳозирга келиб у Чин юртини тарк этиш истагида, бироқ Европага қайтганда ҳам янги жамоаси «Челси» даражасида бўлмаслиги аниқ.