Ўзбекистон терма жамоаси ва «Женоа» ҳужумчиси Элдор Шомуродов фаолиятини «Рома»да давом эттиради.
Италиялик инсайдер Жанлука Ди Марционинг хабар беришича, «Рома» ва «Женоа» клублари трансфер борасида келишувга эришган. Рим клуби Шомуродовни сотиб олиш мажбурияти билан ижарага олади, битим қиймати 17,5 миллион еврони ташкил қилади. Шунингдек, 2,5 миллион миқдоридаги эҳтимолий бонуслар ҳам назарда тутилган. «Женоа» футболчининг кейинги трансферидан 10% улушга эга бўлади.
Шомуродов 2 август, душанба куни шартнома имзолаш учун Римга етиб боради.
Аввалроқ Элдор «Рома» билан 2026 йилгача мўлжалланган шартнома имзолаши ҳақида хабар берилганди. Агар «Рома» келаси мавсумда Чемпионлар Лигасига чиқса, шартномадаги футболчини сотиб олиш банди фаоллашиши айтилганди.
Қайд этиш ўринли, 2020 йилнинг январь ойида Элдорга «Ювентус»дан ҳам қизиқиш бўлган.
Шомуродов 2020/21 йилги мавсум бошида «Ростов»дан 7,5 миллион евро эвазига «Женоа»га ўтган. У ортда қолган мавсумда А Серияда 31 та ўйин ўтказиб, 8 та гол уришга муваффақ бўлди.
Изоҳ (0)