Афсонавий спорт гимнастикачиси Оксана Чусовитина «Матч ТВ» телеканалида бўлиб ўтган суҳбатда Токио—2020 Олимпиадасидаги иштирок, фаолиятига оид фикрлар ва келажакдаги мақсадлари ҳақида айтиб ўтди.
Шуни аниқ айта оламанки, бу Олимпиада мен учун охиргиси. Катта спортдаги фаолиятимни якунладим. Бироқ спортни тарк этмайман, шунчаки йирик мусобақаларда иштирок этмайман.Токио Олимпиадасида иштирок ҳақида
Албатта, бу Олимпиадада боримни намойиш қилишга уриндим. Сакрашим у қадар яхши бўлмади. Финалда қатнашишни жуда хоҳлагандим, афсуски, бу рўёбга чиқмади. Бу билан ҳаёт тўхтаб қолмайди, деб ўйлайман. Олдинга юришда давом этамиз.
Спортдан кейинги ҳаёт ҳақида
Энди менда спортдан ташқарида бошқача ҳаёт кечириш имконияти туғилди. Менимча, у ерда ҳам худди катта спортдаги каби қизиқ бўлади. Оилам билан бўлишни, турмуш ўртоғим, ўғлим билан кўпроқ вақт ўтказишни истайман. Таътил оламан, қандайдир денгиз соҳилида ҳордиқ чиқараман. Ниҳоят, тонгда эрта туриб, машғулот ўтказиш учун фитнес залига боришга мажбур эмасман.
Сўнгги иштирокдан кейинги кечинмалар ҳақида
Жуда қайғули, спортга «хайр» дейиш анча осон бўлади деб ўйлагандим, ўзимни бунга тайёрлаб келгандим. Бироқ шуни айтиш керак, бу у қадар осон эмас экан, жуда оғир бўлди. Умрингни ярмини бағишлаган нарса билан хайрлашиш жуда қайғули.
Қўллаб-қувватлашлар ичида энг эсда қоларлилари борасида
Кўплаб инсонлардан хатлар олдим, уларни эрталабгача санаш мумкин. Бироқ энг муҳими ўғлимнинг сўзлари бўлди. Ўғлим унинг учун доим чемпион бўлиб қолишимни, мени яхши кўриши ва мендан ғурурланишини айтди. Мен учун бу энг ёқимли ва энг асосий сўзлар.
Спортдаги энг ёдда қоларли медал ҳақида
Фаолиятимдаги энг ёрқин воқеа медал билан боғлиқ эмас. Бу ҳодиса Пекиндаги (2008 йил) Олимпиадада содир бўлганди. Унда мен кумуш медални қўлга киритгандим. Бироқ медал эмас, ундан кейинги воқеа бутун умрга хотирамда қолган. Уйга қайтишимиздан олдин, ўғлимни навбатдаги тиббий кўрикка олиб борганимизда шифокорлар унинг буткул соғайганини айтди. Бу хушхабарга ҳеч қандай олтин медал тенг кела олмайди.
Ўзбекистонда гимнастиканинг ҳолати ҳақидаОксана 25 июль куни Токио Олимпиадаси саралаш босқичида иштирок этди. Унинг натижаси финал йўлланмаси учун етарли бўлмади.Менимча гимнастика ривожланишда давом этади. Бунинг йўлида қўлимдан келган барча ишни қиламан. Барча тажриба ва билимларни бу йўлда сарфлайман. Бизда жуда кўплаб иқтидорли қизалоқлар бор. Улар Японияда шу йили ўтказиладиган Жаҳон чемпионатида ўзини намойиш қилади. Мен уларга мухлислик қиламан.
Гимнастика — аввал ва ҳозир
Ҳозирда гимнастика бироз қийин бўлиб қолган, жуда қийин элементлар амалга оширилмоқда ва бу жароҳат етказиши мумкин бўлган спорт турига айланиб қолди. Бироқ шу билан бирга жиҳозлар анча яхшиланди. Шунингдек, ҳакамликда ҳам жуда катта ўзгаришлар бўлди.
Оксана Чусовитина, гимнастикачи
Чусовитина 1975 йилнинг 19 июнида Бухоро вилоятида туғилган. У гимнастика бўйича собиқ СССР, Ўзбекистон ва Германия терма жамоалари шарафини ҳимоя қилган. 1992 йилда ўтказилган Олимпиада ўйинлари чемпиони, 2008 йилги ёзги ўйинлар кумуш медали эгаси. Чусовитина саккизта Олимпиадада иштирок этган тарихдаги ягона гимнастикачи ҳисобланади.
Изоҳ (0)