Сурхондарёда профилактика инспекторининг ёрдамчилари ИИБга олиб кетилаётган фуқарони уриб, ўлдириб қўйгани тўғрисида хабар берилганди. Ижтимоий тармоқларда марҳумнинг хотини экани айтилаётган аёл эри вафот этганда қандай ҳолатда бўлганини айтиб бергани тасвирланган видео тарқалди.
Аёлнинг сўзларига кўра, аввалига унга эрини кўрсатишмаган, уни кўрганида эса танасида кўкарган ва эзилган жойлар борлигига гувоҳ бўлган. «Ҳайвонларча уришган, одам боласи ундай урмайди», — дейди у.
Бош прокуратуранинг маълум қилишича, 10 июлда Денов тумани «Оқтом» маҳалласида яшовчи фуқаро Й.Х. туман ички ишлар бўлимига акаси Ҳ.Х. маст ҳолда яшаш уйида жанжал қилиб, тинчлигини бузаётгани ҳақида хабар берган.
Шунга асосан, туман ИИО ФМБ профилактика инспектори ва унинг икки нафар ёрдамчиси Ҳ.Х.нинг хонадонига келган ва уни автомашинага ўтказиб, туман ИИБга олиб кетган. Йўлда профилактика инспекторининг ёрдамчилари Ҳ.Х.ни бир неча бор уриб тан жароҳати етказган. Оқибатда Ҳ.Х. 11 июль куни шифохонада вафот этган.
Марҳум хотинининг сўзларига кўра, эр ва аёл ўртасида рашк сабабли жанжал келиб чиққан, жанжал давомида қайната ва қайнакаси келиб, уларни тинчлантиришга уринган. Шундан сўнг эр ҳам, аёл ҳам ишга кетган. Аёл ишдалигида қайнсинглиси унга қўнғироқ қилиб, эрини ички ишлар ходимлари қўлига кишан солиб олиб кетишганини айтган.
«Мен милицияхонага, ‘учацковой’га чопдим. Эримни кўрсатишмади. «Нима учун олиб келдинглар, катта жанжал бўлгани йўқ-ку?’ дедим. ‘Участкавой’ рухсат берса кўрасан, бўлмаса кўрмайсан дейишди. Унинг телефон рақамини билмасдим. Кейин ўзлари ўйин қилиб унинг рақамини олиб беришди. Ўша ердаги дўконга келган йигитнинг телефонида ‘участковой’ Мелиқул акага телефон қилдим, эримни кўрсатинглар дедим. У эса ‘Сен аралашма, ишинг бўлмасин, эринг надзорда туради’, деб телефонни ўчириб қўйди», — дейди аёл.
Марҳумнинг рафиқасини айтишича, у кечгача ИИБ биноси олдида ўтирган, бироқ унга эрини кўрсатишмаган. Эртаси куни аёл ишдалигида қайнсинглиси телефон қилиб, акаси касалхонада эканини айтган.
«Қўлимда болам билан учиб етиб бордим. Борсам, эрим бир авҳолда... Ҳайвонларча урган уни, одам боласи ундай урмайди. Нима учун урган? Жигари эзилган, боши ёрилиб кетган, ҳамма тарафи — кўзлари қорайган, лаблари шишган. Эркаклик жойларигача ёриб ташлаган. Одам ҳам шунчалик ваҳшийлик қиладими?! Иккита болам билан қаерга бораман? Органга мумкинми бировни ўлдириш?» – дейди аёл.
Бош прокуратуранинг маълум қилишича, мазкур ҳолат юзасидан Денов туман прокуратураси томонидан Жиноят кодексининг 104 (қасддан баданга оғир шикаст етказиш) ва 206-моддаси (ҳокимият ёки мансаб ваколати доирасидан четга чиқиш) билан жиноят иши қўзғатилган.
Жиноят иши доирасида 2 нафар шахсга нисбатан қамоққа олиш эҳтиёт чораси қўлланилган. Сурхондарё вилоят прокуратураси томонидан тергов ҳаракатлари олиб борилмоқда.
Изоҳ (0)