Эҳтиросли ҳайқириқлар ва қувонч кўз ёшлари: Давлат Бобонов Олимпиада совриндори бўлган жангни унинг оила аъзолари қандай томоша қилди? (видео)

Дзюдо бўйича -90 кг вазн тоифасида ҳаракат қилган Давлат Бобонов Токио—2020 Олимпиадаси бронза медалига эга чиқди.

Туризм ва спорт вазирлиги Бобоновнинг ғалабали онлари унинг оила аъзолари томонидан қай тариқа кутиб олингани ҳақидаги видеони намойиш қилди. Видеода Бобоновнинг ота-онаси, акаси ва бошқа қариндошлари спортчига бронза медалини келтирган жангни томоша қилаётган вазият тасвирланган.

Эслатиб ўтамиз, 24 ёшли Бобонов 1/16 финалда италиялик Николас Мунгайни таслим этди, 1/8 финалда украиналик Нябали Кежауни енгган бўлса, чорак финалда грузиялик Лаша Бекаурига ютқазиб қўйди. Ўтиш баҳсида Бобонов испаниялик Николос Шеразадишвилини вазари баҳоси билан мағлуб этди. Бронза учун кечган баҳсда эса туркиялик Миҳаэл Зганкни иппон баҳоси билан енгди.

Шу тариқа Бобонов Ўзбекистон делегациясига Токио—2020 да иккинчи медални тақдим этди. Аввалроқ таэквондочи Улуғбек Рашидов олтин медалга эга чиққанди.

Давлат Бобонов 1997 йилнинг 7 июнида Навоий вилоятида дунёга келган. У дзюдо бўйича 2021 йилги Осиё чемпионати ғолиби ва ЖЧ—2021 кумуш медали соҳиби ҳисобланади. Давлат Будапештда ўтган Жаҳон чемпионати финалида Николос Шеразадишвига ютқазиб қўйганди.