Япониянинг Токио шаҳри мезбонлик қилаётган Олимпия ўйинларида ўзбекистонлик спортчилар 29 июль кунги чиқишларини якунлади.
Академик эшкак эшиш
Шаҳбоз Холмирзаев ва Собир Сафаралиев жуфтлиги 13—18-ўринларни аниқлаб берган мусобақада қатнашди. Унда ўзбекистонлик спортчилар 16-поғонани банд этди. Аввалроқ спортчилар саралаш баҳслари, кейинчалик ўтиш мусобақасида тўртинчи ўринни эгаллаб, финал босқичидан қуруқ қолганди.
Дзюдо
-100 кг вазн тоифасида ҳаракат қиладиган Муҳаммадкарим Хуррамов дастлабки босқичда ирландиялик Бенжамин Флетчерни вазари баҳоси билан енгди. 1/8 финалда Хуррамов япониялик Арон Вольфга қарши татамига чиқди ва тажрибали рақибига имкониятни бой бериб қўйди. Шу тариқа Хуррамов яккалик баҳсларидаги иштирокини якунлади.
Шу тариқа ўн кишидан иборат дзюдочилардан тўққиз нафари мусобақадаги иштирокини ўтказишга улгурди. Натижа — 1 та бронза. 30 июль куни Бекмурод Олтибоев (+100 кг) яккалик баҳсларига якун ясаб беради.
Бокс
29 июль куни уч нафар ўзбекистонлик боксчи рингга кўтарилди. Аввалига терма жамоа етакчиси Баҳодир Жалолов (+91 кг) ўз иштирокини бошлади. 1/8 финалда Жалоловга Озарбайжон вакили Муҳаммад Абдуллаев дуч келди. Баҳодир рақиби устидан ишончли ғалабани қўлга киритиб, кейинги босқичга йўл олди. Чорак финалда уни ҳиндистонлик Сатиш Кумарга қарши жанг кутиб турибди. Эслатиб ўтамиз, Жалолов Токио—2020 Олимпиадасига лицензия ўйналган 2020 йилги мусобақада Сатишга қарши жанг қилган ва уни ишончли тарзда мағлуб этганди.
Аёллар боксида -51 кг вазн тоифасида иштирок этган Турсуной Раҳимова 1/8 финалда ушбу дивизионнинг биринчи рақамли вакили — туркиялик Наз Чақирўғлуга қарши жанг қилди. Биринчи раундда тўлиқ устунлик қилган Раҳимова қолган раундларда рақиби билан тенг (3-раундда фаолроқ) ҳаракат қилди. Бироқ якунда ҳакамларнинг тушунарсиз қарори (2:3) Раҳимовани чорак финал йўлланмасидан қуруқ қолдирди.
Аввалроқ Миразизбек Мирзахалилов ҳакамларнинг тушунарсиз қарори туфайли Олимпиадани эрта тарк этганди.
Ушбу куннинг сўнгги жанги -75 кг вазнлик Фанат Қаҳрамонов иштирокида бўлди. Қаҳрамоновга қозоғистонлик кучли боксчи Абилхан Аманкул тўқнаш келди. Дастлабки раундни ўз фойдасига ҳал қилган Фанат кейинги раундларни бой берди ва Олимпия ўйинлари билан хайрлашди.
Шу тариқа Олимпиадани тарк этган ўзбекистонлик боксчилар сони олти нафарга етди. Шаҳобиддин Зоиров, Элнур Абдураимов ва Райҳона Қодирова 1/8 финал баҳсида иштирок этса, Бобоусмон Ботуров ва Баҳодир Жалолов чорак финал йўлланмасига эга чиққан.
Изоҳ (0)