UzNews нашри саёҳатчи ва сураткаш Марат Нажибоев билан ҳамкорликда Устюрт платосида жойлашган Борсакелмас шўр кўлидан фоторепортаж тайёрлади.
Isuzu D-Max Aral Tour экспедицияси доирасида Қорақалпоғистон ҳудудидаги Борсакелмас масканига саёҳат уюштирилган. Бу олдинлар денгиз ости бўлган шўрхок ер. Унинг узунлиги 50 километрни, эни — 35 километрни ташкил этади. Бундан 30 миллион йил олдин бу ерларда Қорақум, Қизилқум чўллари ва Устюрт платосини қамраб олган Тетис океани бўлган.
Таъкидланишича, бу ер хавфли — исталган вақтда саёҳатчи усти юпқа туз қатлами кўринишида қопланган чуқурликка тушиб кетиш мумкин. Туз худди муз каби товлангани сабаб унга термулганда кўзга ёш келади.
Қачонлардир Борсакелмас номи қўриқхона жойлашган оролга тегишли бўлган. Кейин эса у шунчаки йўқолиб кетган. Шўр кўли фантастик фильмларни суратга олишга мўлжалланган майдончага ўхшайди.
Ушбу ҳудудда туз захиралари кўп бўлиб, у минг йилга етиши тахмин қилинган. У ерга фақат Нукусдан машинада етиб олиш мумкин. Шунингдек, бу ерда Қўнғироқ сода заводи учун туз қазиб олинади.
Аввалроқ аввал АҚШдан Оролбўйи аҳолиси учун гуманитар ёрдам юборилгани, Жанубий Корея Оролбўйи минтақаси бўйича траст фондининг молиявий донорига айлангани ҳамда ҳукумат қарори билан Орол денгизи ва Оролбўйи ҳудудларида ўрмонзор барпо этиладиган майдон белгилангани ҳақида хабар берилганди.
Мавзуга доир:
Изоҳ (0)