Ўзбекистон Президенти Шавкат Мирзиёев 28 июль куни кам таъминланган оилалар ҳамда меҳрибонлик уйларида истиқомат қилувчи болаларни қўллаб-қувватлашга бағишланган видеоселектор йиғилиши ўтказди. Бу ҳақда «Gazeta.uz» хабар қилмоқда.

Фото: «Дарё» /Мадина Нурман

Давлат раҳбари сўзи аввалида бугунги йиғилишда ота-онасидан ажраган, меҳрга муҳтож болаларни қўллаб-қувватлашга қаратилган устувор вазифаларни белгилаб олиш зарурлигини қайд этди.

«Албатта, ҳар бир гўдак бу ёруғ дунёга келар экан, унга ҳамма ота-онаси бағрида яйраб ўссин, бахтли-саодатли бўлсин, деб тилак билдиради. Лекин тақдир тақозоси билан уларнинг айримлари ота-она меҳридан бенасиб қолади. Бундай ҳолатда бу норасида болаларнинг асло айби йўқ эканини барчамиз яхши тушунамиз, албатта», — деди у.

Ҳозирги кунда:

  • 13 та болалар уйида 560 нафар бола (3-4 ёш);
  • 16 та меҳрибонлик уйи ва 4 та болалар шаҳарчасида 1,8 минг нафар бола (3 ёшдан 18 ёшгача);
  • 86 та махсус интернатда 21 минг нафар бола (7 ёшдан 18 ёшгача);
  • ҳомийлик, васийлик, оила патронати асосида 79 минг нафар бола тарбияланмоқда.

«Лекин бир ўзимизга савол берайлик, ушбу меҳрга муҳтож болалар ғамхўрликни тўлиқ ҳис қиляптими? Афсуски, йўқ. Бугун Юнусободдаги 21-сон меҳрибонлик уйига борганимда на соҳага масъул вазирлик, на ҳудуд сектор раҳбарлари бу ердаги муҳит ва шароит билан ишламагани аён бўлди», — деди Шавкат Мирзиёев.

Мисол учун, сўнгги 10 йилда меҳрибонлик уйлари ва болалар шаҳарчаларини уй-жойга муҳтож 1 минг 188 нафар битирувчиларидан 610 нафарига ёки 51 фоизига уй-жой ажратилган.

Меҳрибонлик уйларидаги таълим-тарбия ишлари ҳам мутлақо қониқарсиз. Шунингдек, меҳрибонлик уйлари битирувчиларининг атиги 1,6 минг нафари ёки 64 фоизи иш билан таъминланган. Шу каби, 2020 йили ихтисослашган мактабларни битирган 1,5 мингдан зиёд ногиронлиги бор ёшларнинг атиги 264 нафари ишга жойлаштирилган.

Бундан аввал Ўзбекистонда 18 ёшга тўлган, уй-жойга муҳтож етим болаларга янги қурилган уй-жойлар бепул ажратилиши, Ўзбекистондаги васийлик, ҳомийлик ва патронатга олинган болаларга 18 ёшга тўлгунига қадар маҳаллий бюджетдан 1,2 млн сўмдан тўланиши ҳамда Тошкентдаги меҳрибонлик уйлари олийгоҳларга бириктирилиши ҳақида хабар берилганди.