Ватикан тарихда биринчи марта ўз мулкига оид маълумотларни эълон қилди, деб ёзади The Guardian. Шаҳар-давлат Италия ва ундан ташқарида 5 мингдан ортиқ кўчмас мулк объектларига эгалик қилади.
Ватикан мулки тўғрисидаги маълумотлар иккита ҳужжатда — Муқаддас Тахтнинг 2020 йилги консолидацияланган молиявий ҳисоботида ҳамда Муқаддас Тахт мулки бошқармасининг биринчи оммавий бюджети (АPSA)да келтирилган.
АPSA ўзига хос бухгалтерия бошқармаси бўлиб, у кўчмас мулк ва инвестицияларни бошқариш, иш ҳақи тўлаш, Муқаддас Тахтнинг харидлар бўлими ва кадрлар билан ишлаш бўлими вазифасини бажаради.
АPSA томонидан эълон қилинган 30 саҳифалик ҳужжатга кўра, Ватикан Италияда 4051 та мулкка, чет элда эса тахминан, 1120 та мулкка эгалик қилади. Бунда Ватиканнинг бутун дунёдаги элчихоналари ҳисобга олинмаган.
Шу билан бирга, Ватиканнинг Италиядаги мол-мулкининг атиги 14 фоизигина бозор нархларида, қолган қисми чегирмали нархларда ижарага берилган, уларнинг аксарияти черков хизматчиларига берилган.
Қайд этилишича, Ватикан мулкининг, тахминан, 40 фоизини институционал бинолар — мактаблар, монастирлар ва шифохоналар ташкил этади. Бундан ташқари, АPSA Лондон, Женева, Лозанна ва Париждаги муҳим жойларда инвестиция мулкларига эга.
Изоҳ (0)