Покистон Читрал вилоятининг Арунду секторига 46 нафар Афғонистон ҳукумати ҳарбийсининг хавфсиз ўтишини таъминлаб бергани маълум бўлди. Бу ҳақда Pajhwok ахборот агентлиги хабар қилган.
Қайд этилишича, афғонистонлик ҳарбийлар оқшом пайтида Читралдаги Арунду секторига етиб келган.
«Афғонистон ҳукумати билан зарур ҳарбий жараёнлар бўйича мулоқотдан кейин орасида 5 нафар зобит ҳам бўлган жами 46 нафар ҳарбий Покистон ҳудудига хавфсиз ўтиб олди. Афғонистонлик ҳарбийларга озиқ-овқат, бошпана ва ҳарбий меъёрларга мувофиқ тиббий ёрдам кўрсатилган», — дея қўшимча қилган агентлик.
Афғонистонлик ҳарбийлар тегишли ҳуқуқий жараёнлар амалга оширилганидан кейин ортга қайтарилади.
Шунингдек, Pajhwok ахборот агентлиги 1 июлда ҳам 35 нафар афғон аскари Покистон армиясидан бошпана сўрагани ва улар ҳам чегара яқинидаги постни «Толибон» вакилларига бой берганини эслатган. Улар ҳам Покистон ҳудудига ўтган ва кейинчалик халқаро меъёрларга мувофиқ Афғонистонга қайтарилган.
Афғонистон ҳарбийлари, тинч аҳоли вакилларининг бошқа қўшни давлатлар — Ўзбекистон ва Тожикистон ҳудудига қочиб ўтиш ҳолатлари ҳам тез-тез содир бўлиб турибди.
Аввал Тожикистон 100 минг нафар афғонистонлик қочқинни қабул қилишга тайёрлиги, Покистон ҳарбийлари Афғонистоннинг «Толибон» эгаллаб олган чегара ҳудудига киргани, Афғонистон Ички ишлар вазирлиги мамлакатдаги 31 та вилоятда комендантлик соати эълон қилгани ҳақида хабарлар берилган.
Изоҳ (0)