Президент сайлови муносабати билан Ўзбекистонга ДИИҲБнинг тўлақонли миссияси келиши маълум қилинди

Ўзбекистонда 2021 йилнинг 24 октябрь куни бўлиб ўтадиган Президент сайловига ЕХҲТ Демократик институтлар ва инсон ҳуқуқлари бўйича бюросининг тўлақонли миссиясини юборади. Бу ҳақда Марказий сайлов комиссиясининг 23- июль, жума куни бўлиб ўтган навбатдаги йиғилишида сўз юритилди, дея хабар бермоқда «Дарё» мухбири.

МСК раиси ўринбосари Баҳром Қўчқоров «Хорижлик экспертларнинг иштироки Ўзбекистон учун қандай аҳамиятга эга?», деган саволга шундай жавоб қайтарди:

«Хорижлик кузатувчиларнинг иштироки биз учун жуда ҳам муҳим масала. Сайлов қонунчилигида 2019 йилдан кейинги даврда бўлган ўзгаришларнинг ўзимиз ҳам гувоҳи бўлиб турибмиз. Ўзгаришларнинг аксарияти ЕХҲТ Демократик институтлар ва инсон ҳуқуқлари бўйича бюросининг Эҳтиёжларни баҳолаш миссиясининг тавсиялари, яъни демократик стандартларнинг миллий қонунчилигимизга жорий қилинишига, давлатимизда демократиянинг қарор топишига бир асос бўляпти. Сайлов тизимимизга ташқаридан холис кўз билан қараш бизга жуда муҳим. Уларнинг баҳоси бизнинг демократик, очиқ сайлов ўтказишимизга асос бўлади.

Қолаверса, бу нафақат сайлов амалиётини такомиллаштириш, балки сайловчиларимизнинг сайлов ҳуқуқини таъминлаб бериш билан ҳам боғлиқ. Бу келажакда демократик ўзгаришларга сабаб бўлиши мумкин. Шунинг учун биз тўлақонли кузатувчилар миссиясининг юборилишини сўраганмиз. Таклифимиз бюро томонидан қўллаб-қувватланиб, бўлажак сайловларга 28 нафар узоқ муддатли кузатувчилар ва 250 нафар қисқа муддатли кузатувчилар юборилиши қарор қилинди. Ушбу миссиянинг баҳоси давлатимизнинг демократик сайлов тизимига баҳосидир ҳамда бу Ўзбекистоннинг дунё миқёсидаги демократик имижига ижобий таъсир кўрсатади, деган умиддамиз», — деди Қўчқоров.