Ўзбекистонда COVID-19 касаллиги бўйича ташкил қилинган Call-марказларга мурожаатлар сони июль ойига келиб кескин кўтарилди, дея хабар бермоқда ССВ матбуот хизмати.
Қайд этилишича, 2020 йил касаллик авжига чиққан вақтда Call-марказда 200 нафардан ортиқ профессор-ўқитувчилар, тажрибали шифокорлар уч сменада узлуксиз фуқароларнинг мурожаатларини қабул қилган эди. 2021 йилнинг май—июнь ойларида марказда 15 нафар мутахассис қўнғироқларга жавоб берган бўлса, июлда мурожаатлар сони ошгани муносабати билан ой бошида 25 нафар, ҳозирда эса 50 нафар мутахассис навбатма-навбат тун-у кун уч сменада хизмат қилмоқда.
Уларнинг орасида тиббиёт фанлари номзоди ва докторлари, малакали мутахассислар бўлиб, фуқаролардан тушган саволларга тиббий асосланган жавоблар ва тавсиялар бермоқда.
Маълумот қилинишича, Call-марказга 2021 йилнинг май ойида кунига ўртача 300 та қўнғироқ келиб тушган бўлса, июнь ойида бир кунда ўртача 200—400 нафар фуқаро мурожаат қилган.
Июль ойига келиб эса кунлик мурожаатлар сони ўртача 1800 тагача кўтарилган. Шундан июлнинг биринчи ўн кунлигида ўртача мурожаатлар сони кунига 1450 тани, иккинчи ўн кунлигида эса 2080 тани ташкил қилди.
Жумладан, 15—25 июль кунлари жами 23 436 та қўнғироқ келиб тушди, солиштириш учун: июнь ойининг худди шу даврида 3711 нафар фуқаро қўнғироқ қилганди.
Энг кўп берилаётган саволлар қаторида, бугун вируснинг қайси штаммлари Ўзбекистонда қайд этилган, улар клиникаси бўйича бир-биридан қандай фарқ қилади, болаларда уларнинг белгилари қандай намоён бўлмоқда, бир марта касалланган киши яна қайта вирусни юқтириши мумкинми каби қатор саволлар берилмоқда. Шунингдек, коронавирусга қарши эмлаш билан боғлиқ саволлар ҳам долзарб бўлиб турибди.
«Бундан ташқари, касалликнинг енгил шаклини бошидан ўтказаётган фуқаролар ҳам мурожаат қилиб, уй шароитида қандай даволаниш, қайси дори воситаларини қабул қилишлари кераклигини сўрашмоқда.
Албатта, биз уларга дориларни тавсия эта олмаймиз. Шунинг учун бундай тавсия бера оладиган тиббиёт ходимларига, хусусан, оилавий поликлиникадаги шифокорларга мурожаат қилишлари кераклиги, у ерда эса беморга ҳолатига қараб дорилар тўплами берилишини айтамиз. Таъкидлаш лозимки, фуқароларнинг берган саволлари бир-бирини қайтармайди. Ҳар қайсисини алоҳида деталлар қизиқтиради. Мутахассисларимиз шунга мос тарзда, уларни қониқтирган ҳолда жавоб беришга ҳаракат қилмоқда», — дейди Call-марказ мутахассиси Феруз Тожиев.
Шунингдек, мурожаатчилар Тошкент шаҳар ва вилоятлардаги COVID-19 билан оғриган беморларни қабул қилаётган шифохоналарнинг манзили ва қайси тиббиёт муассасаларида бўш жой мавжудлигини ҳам сўрамоқда.
Маълум қилинишича, бугунги кунда коронавирус инфекцияси, пневмония ёки ушбу касалликларга гумон қилинган ва бошқа юқумли хасталиклар билан касалланган беморларни даволаш мақсадида Ўзбекистон бўйича жами 82 та махсус шифохона фаолият юритмоқда.
Касаллик клиник белгиларсиз ва енгил кечаётгани сабабли уй шароитида даволанаётган беморлар саломатлиги назорати ва даволанишини ташкил этиш ҳамда уларга амбулатор ҳамда бемор уйига борган ҳолда хизмат кўрсатишни ташкил қилиш мақсадида 124 та ихтисослаштирилган махсус поликлиника фаолияти йўлга қўйилган. Уларда 222 та «мобил бригадалар» ташкил этилган.
Изоҳ (0)