Собиқ MMA жангчиси Мурод Хонтўраев автоҳалокатга учраб, вафот этгани тўғрисида хабар берилганди. Ушбу ЙТҲ бўйича «Дарё» сўровига кўра Тошкент вилояти Ички ишлар бош бошқармаси ҳузуридаги Тергов бошқармаси томонидан маълумот тақдим этилди.
Қайд этилишича, 2021 йил 19 июль куни соат тахминан 11:00 ларда 1987 йилда туғилган, Мурод Хонтўраев Махамадусманович ўзига тегишли BMW X5 XDRIVE40I русумли, давлат рақами 01R 007 HA бўлган автомашинани Бўстонлиқ тумани, Қоранқул қишлоғи ҳудудидан ўтган 4Р6 Бектемир–Чорбоғ автомобиль йўлининг 68-километрида Бектемир йўналиши бўйлаб бошқариб бораётиб ўзи билан бир йўналишда, олдинда ҳаракатланиб кетаётган, 1984 йилда туғилган, Азамат Усманов Абдусаматовичнинг бошқарувидаги, ишончнома орқали бошқараётган фуқаро Ўктам Усманов Мирзаевичга тегишли, Lacetti русумли, давлат рақам белгиси 20M 212 DA бўлган автомашинанинг орқа чап бурчагига тўқнашган.
Шундан сўнг автомашина рул бошқарувини йўқотиб, йўналиши бўйича йўлнинг ўнг четидаги пастликда жойлашган маккажўхори дала ер майдонига ағдарилиб тушиб кетган.
Оқибатда ҳайдовчи Мурод Хонтўраев тан жароҳатлари олиб ҳодиса жойида вафот этган.
Шунингдек, ушбу автомашина олд ўриндиғида бўлган йўловчи, 1995 йилда туғилган, Жасурбек Анорбоев Бахтиёр ўғли «бош мия ёпиқ жароҳати, мия чайқалиши, юз қисми ҳамда кўкрак қафасида лат ейиш, қон талаш» каби тан жароҳатлари билан РШТЁИМга ётқизилган.
Мазкур ҳолат юзасидан Бўстонлиқ тумани ИИБ ҳузуридаги Тергов бўлими томонидан 2021 йил 19 июлда Жиноят кодексининг 266-моддаси 2-қисми (одам ўлимига сабаб бўлган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган.
Жиноят иши 2021 йил 22 июлда Тошкент вилояти ИИББ ҳузуридаги Тергов бошқармаси томонидан иш юритувига олинган ҳамда ҳозирда дастлабки тергов ҳаракатлари олиб борилмоқда.
Изоҳ (0)