Бош прокуратура ҳузуридаги Департамент ҳамда ДХХнинг Қорақалпоғистон Республикаси бошқармалари томонидан ўтказилган тезкор тадбирда 23 минг доллар эвазига Қорақалпоқ давлат университетига ўқишга киритиб қўйишни ваъда қилган шахс қўлга олинди.
Маълум қилинишича, Р.А. исмли шахс фуқаро Ў.ни 23 минг доллар эвазига Бердақ номидаги Қорақалпоқ давлат университетининг ҳуқуқшунослик факультетига ёки 4 минг доллар эвазига жисмоний тарбия факультетига ўқишга киритиб қўйишга ишонтирган. Хизмати эвазига у олдиндан 10 минг доллар ва 40 миллион сўмни олган вақтида ашёвий далиллар билан ушланган.
Шунингдек, Департамент ҳамда ДХХнинг Бешариқ тумани бўлимлари томонидан ўтказилган тезкор тадбирда Д.Х. исмли шахс фуқаро М.ни юқори лавозимда ишловчи танишлари ёрдамида минг доллар эвазига Қўқон давлат педагогика институтининг психология факультетига ўқишга киритиб қўйишни ваъда қилган. Бунинг учун у олдиндан 500 долларни олган вақтида ашёвий далиллар билан ушланган.
Вилоятнинг Данғара туманида ўтказилган тезкор тадбирда эса «Б.С.» нодавлат таълим муассасаси раҳбари фуқаро Г.нинг ишончига кириб, уни Қўқон педагогика институтига 2,5 минг доллар эвазига ўқишга киритиб қўйишини айтиб, олдиндан 500 доллар олган вақтида қўлга олинган.
Ҳозирда мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Тошкентда фуқаронинг Қозоғистондаги ўқишини Самарқанд тиббиёт институтига кўчириб бериш эвазига 5 минг доллар олган шахс ушлангани, Сурхондарёда талабаларни 5,4 миллион сўмга чув тушириб кетган шахсга нисбатан жиноий иш қўзғатилгани, Тошкентда фуқарони жисмоний тарбия университетига ўқишга киритиб қўйиш учун 7 минг доллар сўраган ўқитувчи қўлга олингани ҳамда Сурхондарёда талабанинг ўқишини Қозоғистондан Ўзбекистонга кўчириб бериш учун 15,6 миллион сўм ва 300 доллар сўраган шахс ушлангани ҳақида хабар берилганди.
Изоҳ (0)