Наманганда йўловчиларни манзилига бепул элтиб қўядиган кўнгиллилар фаолият олиб бормоқда. Улар бу ташаббусни мамлакатга ёйиш ниятида

Наманганда йўловчиларни манзилига бепул элтиб қўядиган кўнгиллилар фаолият олиб бормоқда. Бу ҳақда «Дарё» мухбири Азизбек Абдувалиев хабар бермоқда.

«Автопопутчики Намангана» («Наманган автоҳамроҳлари») гуруҳи маъмурларидан бири Ойбек Дадамирзаевнинг айтишича, шундай фаолиятни йўлга қўйиш фикри 2021 йил бошида, Янги йил байрамларидан сўнг туғилган.

«Ҳаётда турли муаммолар юзага келади, киши баъзан йўлкирага ҳам пул тополмай қолиши мумкин. Кимдадир эса автомобилида йўловчини бепул олиб кетиш имконияти бор. Шу икки тоифани гуруҳимизда бирлаштирдик. Олдин 10 киши эдик, кейин 50 киши бўлдик. Сўнг 100, 1000 киши. Бугунги кунга келиб, Telegram’даги гуруҳимиз аъзолари сони 22 мингдан ошди», — дейди Ойбек Дадамирзаев.

Дадамирзаевнинг айтишича, йўловчиларни манзилига бепул элтиб қўйиш билан шуғулланаётган инсонлар қаторида турли қатлам вакиллари, жумладан, тадбиркорлар, ҳунармандлар, давлат идоралари ходимлари бор. Бир кунда камида 30 киши бу хизматдан фойдаланмоқда.

Бунинг учун гуруҳнинг ижтимоий тармоқдаги манзилига қай манзилдалиги ва қаерга бормоқчи эканлигини ёзиб қўйиш кифоя. Худди шундай, ҳайдовчи ҳам неча кишини ва қаерга элтиб қўйиш имконияти борлиги ҳақида билдирги қолдиради.

«Намангандаги узоқ-яқин манзиллардан ташқари пойтахтга турли юмушлар, хусусан, касалхоналарга кетаётганлар ёки аксинча, Тошкентдан қайтмоқчи бўлган, бироқ айрим сабабларга кўра бунга қурби етмаётганлар кўп. Йўлкирага пул тополмай қолганларни ҳатто Россиядан ҳам текинга олиб келяпмиз.

Йўловчиларни энг кўп манзилига элтиб қўяётган ҳайдовчиларни гуруҳимиз аъзолари ёрдамида турли усуллар билан рағбатлантириб боришга ҳаракат қиламиз. Айтайлик, машинаси таъмирига ёрдам, пульт ўрнатиб бериш ёки автопарфюмерия совға қилиш ва ҳоказо. Кўпларини сиртдан таниймиз. Пўлатжон деган акамиз бор, ўзига хос рекорд ўрнатди: бизга қўшилганларидан бери йўловчиларни бепул олиб кетиш бўйича 85 маротаба эълон берибди.

Шу билан бирга, имкони, пули бўла туриб машиналаримиз хизматидан текинга фойдаланишга уринган шахслар ҳам бўлди. Яна қайта-қайта денг. Улар аниқланиб, ‘қора рўйхатъга киритилади ва гуруҳдан четлатилади», — дейди суҳбатдошимиз.

Ойбек Дадамирзаевнинг айтишича, ҳозир шундай фаолиятни Тошкент шаҳри ва барча вилоятларда йўлга қўйишга ҳаракат қилинмоқда. Намангандан ташқари дастлабки четдаги лойиҳа эса Фарғона вилоятида амалга оширилмоқда.