Чехиялик уста 986 кузовидаги 20 йиллик Porsche Boxster’ни ҳайратланарли McLaren F1 нусхасига айлантирди. У ўз гаражида Гордон Мюррей суперкари руҳидаги оригинал кузовни яратишга муваффақ бўлган — унинг нафақат пропорциялари, ранги ёки оптикалари, балки кинематик эшиклари, юкхонани очувчи механизмлари ҳам мос келади. Бундан ташқари, уста ҳайдовчи ўриндиғини ҳам аслидек ўрнатган — оригинал моделдаги каби ҳайдовчи марказда ўтиради, деб хабар беради Motor.
Номаълум уста Porsche Boxster’нинг McLaren F1 нусхасига айланиш жараёнига изоҳ бермаган, бироқ суратларга кўра, унда моделнинг чизмалари бор. Тайёр автомобилни YouTube’даги қатор роликлар орқали яқиндан томоша қилиш мумкин.
Ноодатий нусха eBay’да McLaren F1 нусхаси сотувга қўйилгани тўғрисида пайдо бўлган эълондан сўнг топилган. Машина эгасининг таъкидлашича, автомобиль «тўлиқ техник ҳужжатларга» эга, машина асосини 2001 йилги Boxster 986 ташкил этади.
Машина қуввати тўғрисида маълумот берилмаган, аммо харидор 220 ёки 250 от кучилик мотор, Tiptronic автомат узатмалар қутисига умид қилиши мумкин.
Машинанинг салон қисмида McLaren F1 билан ўхшашлик у қадар сезилмайди, аммо оригинал суперкар ичига ҳам етарлича ўзгартириш киритилган. Нусха яратувчиси бошқарув органларини марказга силжитиб, ечиладиган руль ўрнатган.
Ноодатий купе нархи ошкор қилинмаган, аммо сотувчи машинани 51 минг фунт стерлингга сотишга рози бўлмай, уни сайтдан олиб ташлаган. Нима бўлган тақдирда ҳам мазкур автомобиль 20 миллион доллар турадиган ҳақиқий McLaren F1’дан анча арзон туради.
Аввалроқ таиландлик фермер лойдан Bugatti Chiron’нинг нусхасини яратгани, АҚШда Lamborghini Aventador’нинг картон нусхаси янги Cobalt нархида сотилгани тўғрисида хабар берилганди.
Мавзуга доир:
Изоҳ (0)