АҚШнинг Орегон штатида йирик ўрмон ёнғинлари туфайли минглаб одамларни шошилинч равишда эвакуация қилишга тўғри келди, деб ёзади BBC News.

Фото: Getty Images

Кенг қамровли ёнғинлар натижасида камида 160 та турар жой бинолари ва қўшимча бинолар вайрон бўлган. Кучли шамол ва қуруқ об-ҳаво туфайли ёнғин бутун штат бўйлаб тарқалишда давом этиб, камида яна мингта бинога таҳдид солмоқда. Уйлари вайрон бўлган аҳоли учун бир нечта эвакуация марказлари ташкил этилди.

Айни пайтда, икки мингга яқин ёнғин хизмати ходимлари табиий офатга қарши курашмоқда. «Биз кун-тун ёнғинни бартараф қилиш ишларини олиб бормоқдамиз», — деди ўт ўчириш қўмондони Жо Хессел. Орегондан ташқари АҚШнинг бошқа штатлари: Калифорния, Айдаҳо, Вашингтон ва Монтанада ҳам ёнғинлар авж олмоқда.

АҚШда ўрмон ёнғинлари тез-тез содир бўлади. 2020 йил август ойида Калифорния губернатори Гевин Ньюсом маҳаллий аҳолини ҳудуд бўйлаб тез тарқалаётган ёнғинлар сабабли штатни зудлик билан тарк этишга чақирганди. Ўшанда рекорд даражадаги ёнғинлар натижасида ўнлаб одамлар ҳалок бўлган ва яраланган, 500 га яқин турар жой вайрон бўлган. Минтақада ҳатто оловли торнадо ҳам кузатилган.

Аввалроқ Канадада аномал иссиқлик ортидан ўрмон ёнғинлари бошлангани ҳақида хабар берилганди.