Россия ташқи ишлар вазири Сергей Лавров 16 июль куни бўлиб ўтган «Марказий ва Жанубий Осиё: минтақавий боғлиқлик. Таҳдидлар ва имкониятлар» мавзусидаги халқаро конференция якунлари бўйича журналистларга берган интервьюсида афғон аскарларини Марказий Осиё мамлакатларида жойлаштириш режасига муносабат билдирди.
Фото: Россия ТИВ матбуот хизмати
«Америкаликларнинг режасига келсак, улар буни яширмаяпти, фаол равишда ошкор қиляпти. Биринчидан, Марказий Осиё ва Покистон мамлакатларини америкаликлар Афғонистондан олиб чиқиб кетаётган ҳарбий инфратузилманинг бир қисмини жойлаштиришга кўндиришга ҳаракат қилмоқда. Аммо Покистон ва Ўзбекистон бундай бўлмаслигини расман маълум қилган. Улар ўз ҳудудларида бундай инфраструктурани жойлаштирмоқчи эмас», — деган Лавров.
Унинг таъкидлашича, Марказий Осиё ва Россия Ташқи ишлар вазирликлари раҳбарларининг учрашувида ушбу давлатларнинг ҳеч қайси бири ўз ҳудудлари ва аҳолисини бундай хавфга дучор қилиш ниятини билдирмаган.
Марказий Осиё давлатлари раҳбарлари бу ниятлардаги барча хавф-хатарларни яхши тушунмоқда ва ўз манфаатларидан келиб чиқиб тўғри қарор қабул қилади.
«Америкаликларнинг яна бир ташаббуси — улар билан ҳамкорлик қилган афғонларни мамлакатдан олиб кетиш ва Марказий Осиё давлатлари ҳудудларига вақтинча ёки доимий равишда жойлаштиришга ҳаракат қилаётганини муҳокама қилдик. Дастлаб, гап 10 минг киши ҳақида кетганди. Яқинда мен АҚШдаги турли хил сиёсий илм-фан марказларида америкаликлар мунозаралари доирасида йил охирига келиб юз минг кишилик рақам қайд этиб ўтилганини эшитгандим. Бугун ҳам марказий осиёлик ҳамкасбларим томонидан айтиб ўтилди. Улар бу ниятлардаги барча хавф-хатарларни яхши тушунмоқда. Умид қиламанки, улар ўз манфаатларидан келиб чиқиб тўғри қарор қабул қилишади», — деб таъкидлаган Россия ташқи ишлар вазири.
Эслатиб ўтамиз, Президент матбуот котиби Шерзод Асадов Америка ҳукумати томонидан Ўзбекистонга афғон аскарларини вақтинча ўзининг ҳудудида сақлаб туриш бўйича сўров бўлмаганини маълум қилганди. «АҚШ томонидан бундай сўров бўлганини мен билмайман. Ўзбекистонга ҳеч қандай расмий таклиф бўлмаган. Биз бу вазиятда, аввало, Афғонистонни гуманитар ва иқтисодий томондан қўллаб-қувватлаб, ёрдамимизни кўрсатишимиз мумкин», — деган эди Шерзод Асадов.
Шунингдек, 2012 йилда қабул қилинган «Ўзбекистон Республикасининг ташқи сиёсий фаолияти Концепциясини тасдиқлаш тўғрисида»ги ва «Мудофаа тўғрисида»ги қонунга мувофиқ, Ўзбекистон ҳудудида ҳеч қандай хорижий ҳарбий базаларнинг жойлаштирилиши мумкин эмаслиги ва Ўзбекистон ҳеч қандай ҳарбий-сиёсий блокларга ҳам қўшила олмаслигини айтганди.
