Хитойда меҳмонхона қулаб тушиши оқибатида 17 киши ҳалок бўлди (фото)

Хитойнинг Цзянсу провинцияси, Сучжоу шаҳридаги «Кайюань» меҳмонхона биносининг қулаб тушиши оқибатида 17 киши ҳалок бўлди. Бу ҳақда маҳаллий ҳукуматга таяниб, «Интерфакс» хабар берди.

Фожиа 12 июль куни содир бўлган. Қидирув-қутарув ва вайроналарни демонтаж қилиш ишларига 600 дан ортиқ одам, кранлар ва бошқа техникалар жалб қилинган. Натижада, бино вайроналари остидан асосан меҳмонхона меҳмонларидан иборат бўлган 23 киши олиб чиқилган, улардан беш нафари турли даражадаги жароҳатлар билан касалхонага ётқизилган.

«13 июль куни соат 09:00 га (Тошкент вақти билан 06:00) келиб барча қидирув-қутқарув ишлари якунланди», — дейилади Хитой марказий телеканалида.

Маҳаллий ҳукумат меҳмонхона қулашининг дастлабки сабаби сифатида бино эгаси томонидан рухсатсиз бошланган реконструкцияни қайд этди. Ҳодиса юзасидан тергов ишлари давом этмоқда.

13 июль куни эрталаб Россиянинг Геленжик шаҳридаги меҳмонхонада газ портлаганди. Ҳодиса оқибатида икки киши ҳалок бўлган, яна беш киши жароҳат олган. Меҳмонхонадан 50 киши эвакуация қилинган.

Аввалроқ Флоридада 12 қаватли турар жой қулаб тушиб, 99 киши бедарак йўқолгани, сўнг бинонинг омон қолган қисми ҳам портлатиб бузилгани, бино вайроналари остидан омон қолганларни қидириш тўхтатилгани ҳақида хабарлар берилганди.