Саратонни енгган 118 яшар Кане Танаканинг узоқ умр кўриш сири нимада?

Икки марта саратон ташхиси қўйилганига қарамай, узоқ умр кўришга муваффақ бўлган ва Ер юзидаги энг кекса фуқаро деб топилган Кане Танаканинг қандай қилиб бундай натижага эришгани ҳақида маълумот бериб ўтамиз.

Кане Танака ким?

Кане Танака бутун умри давомида ўзининг шахсий дўконида японча ширинликлар, лағмон ва гуруч сотган оддий япон аёли. У 1903 йил 2 январь куни Кадзаки қишлоғида кўп фарзандли оилада дунёга келган. Амакиваччаси Хидеога турмушга чиққан аёл турмуши давомида тўрт нафар фарзандни дунёга келтирган, биттасини эса асраб олган. 1993 йилда турмуш ўртоғи вафот этган аёлга 46 ёшида ошқозон ости бези, 103 ёшида эса йўғон ичак саратони ташхиси қўйилган. Айни вақтда ёши 118 дан катта бўлган Танаканинг исми 2019 йилда «Сайёранинг энг кекса фуқароси» сифатида Гиннеснинг рекордлари китобига киритилган. Саратон ташхиси қўйилишига қарамай, узоқ умр кўришга муваффақ бўлган аёл бунинг сири нимада экани ҳақида бошқалар билан ҳам бўлишишга қарор қилган.

Овқатланиш

Японияда 100 ёшдан ошган 30 минг инсон яшайди. Уларнинг аксарияти узоқ умр кўриш японча овқатланиш тизимларидан бири билан боғлиқлигига ишонади. Япон тилидан қориннинг 80 фоиз тўлиши деб таржима қилинадиган — «Хара хати бу» овқатланиш тизими калорияни онгли равишда қисқартиришга асосланади. Японлар қорин 80 фоиз тўйса, шифокорга мурожаат қилишга ҳожат бўлмаслигига ишонади.

Қандай қилиб деярли тўйганликни билиш мумкин, деган саволга японлар қорин тўйгани ҳис қилинса-ю, лекин яна нимадир ейиш исталса, 20 дақиқа кутиш керак, деб жавоб беради. Бу вақт ошқозоннинг тўқлик ҳақидаги сигнали мияга бориши учун муҳим саналади. Сигнал етиб бормаган тақдирда, секин-аста овқатланишни бошласа бўлади.

Ўзини ўзи сийлаш

Парҳез тутишни бошлаган инсоннинг кайфияти чекланганлик ҳисобига тез-тез ўзгариб туриши ҳеч кимга сир эмас. Буни яхши билган Кане баъзида ўзини ўзи сийлашни канда қилмаган. Ширинликсевар аёл йилларини айнан шоколад ва қаҳвага бўлган севгиси сабаб яшаб ўтганини таъкидлаган. Гиннеснинг рекордлар китобига киритиш муносабати билан ташкил қилинган маросимда Канега мукофот билан бирга бир қути конфет ҳам тақдим қилинган. Аёл уялиб ўтирмаган, саҳнанинг ўзида қутини очиб, ширинликлардан ейишни бошлаган.

Мияни чиниқтириш

Худди тана сингари мияни ҳам машқ қилиб, чиниқтириб туриш кераклигини яхши билган Танака китоб ўқиган, математика билан шуғулланган. Ҳозирги кунда дўстлари билан стол ўйинларини ўйнайди ва шеър ёзади. Ундан ўрнак олишингиз, янги тил ўрганишни ёки шеър ёдлашни бошлашингиз, кроссворд ва сканвордлар ечишингиз мумкин — асосийси, доимий равишда шуғулланиш ва ташлаб қўймаслик.

Барвақт уйғониш

Кане соат 6 да шунчаки уйғонмайди, балки ўрнидан туради. 118 ёшда экани ва айни вақтда қариялар уйида яшашига қарамай, у барвақт уйғониш одатини канда қилмайди. Кўчага чиқиб, салқин ҳавода сайр қилади.

Ўз олдига мақсад қўйиш

Аёл ўзининг узоқ умр кўриш сирини собитқадамлик ва тиришқоқликда деб билади. Берган интервьюлардан бирида 120 ёшдан ўтиш учун қўлидан келганича ҳаракат қилишини таъкидлагани бунинг исботи. Шунингдек, Кане кўплаб тавсия ва рецептлардан қатъий назар, ҳамма нарса одамнинг ўзига боғлиқлигини, ҳатто умид йўқдек туйилганида ҳам ҳеч қачон ишончни йўқотмаслик кераклигини таъкидлаган.