Мессининг Аргентина сафидаги илк соврини, Англияни Лондонга «кўмган» Италия ва оёғи синган Конор. Энг сўнгги спорт янгиликлари

Дунё ва ўзбек спортига оид 12 июль тонгининг муҳим хабарлари дайжести билан танишинг.

Ўзбекистон

Россиялик собиқ футболчи, ҳозирда «Красава» блогини юритаётган Евгений Савин «Женоа» клуби ва Ўзбекистон терма жамоаси ҳужумчиси Элдор Шомуродов борасида катта видео материал тайёрлади. Савин футболчининг Жарқўрғондаги уйига ташриф буюрди, унинг агентлари, терма жамоа ва клубдаги шериклари, собиқ мураббийлар ва унга алоқадор кўплаб шахслар билан интервьюлар ташкил қилган.

Жаҳон

11 июль куни жаҳон спортида тўртта муҳим воқеа кузатилди: Копа Америка—2021 финали, UFC 264, Евро—2020 ва Уимблдон финали.

Аргентина терма жамоаси «Маракана»да бўлиб ўтган ўйинда Бразилияни мағлуб этиб, Америка Кубогини қўлга киритди. Бу аргентиналиклар сардори Лионель Месси учун терма жамоа сафидаги илк соврин бўлди. Месси мусобақанинг энг яхши ўйинчиси деб топилди. Шунингдек, у гол уриш ва голли узатмалар сони бўйича турнирнинг энг яхшиси бўлди.

Евро—2020 финали Англиянинг ёрқин ўйини билан бошланди ва Люк Шоу мусобақа тарихидаги энг тезкор голни урган ҳолда жамоасини олдинга олиб чиқди. Бироқ танаффусдан кейин ҳимояга берилган инглизлар якунда жазоланди. 34 ёш-у 71 кунлик Леонардо Бонуччи ҳисобни тенглаштирди ва Евро финалларида гол урган энг ёши катта футболчига айланди. Учрашув тақдирини пенальтилар серияси ҳал қилди. Доннарумма фаолиятидаги бешинчи сериянинг бешинчисини ҳам муваффақиятли ўтказди ва жамоасига ғалаба келтирди.

Пенальтилар сериясида иккита сейв ижро этган Жанлуижи Доннарумма мусобақанинг энг яхши ўйинчиси деб топилди. Энг яхши ёш ўйинчи сифатида Испаниянинг 18 ёшли ярим ҳимоячиси Педри эътироф этилди. Криштиану Роналду 5 та гол билан энг яхши тўпурар бўлди, португалиялик футболчи яна бир бешта гол урган Патрик Шикни голли узатмалар сони бўйича ортда қолдирди. Швейцария вакили Стивен Зубер эса 4 та голли узатма билан энг яхши ассистент бўлди.

Италия терма жамоаси Евро—2020 да 13 та гол урди. Бу терма жамоа учун йирик мусобақалардаги энг яхши натижа бўлди. Турнирда 11 та гол урган Англия Евродаги энг яхши натижасини қайд этди.

Шу тариқа 24 та жамоа иштирок этган ва Европанинг 11 шаҳарида бўлиб ўтган мусобақа ўз ниҳоясига етди. Associated Press’нинг хабар қилишича, УЕФА мусобақа иштирокчилари сонини 32 та оширишни режалаштирилмоқда. Агар ташкилот шуни хоҳлаётган бўлса, у ҳолда 2023 йилга қадар қарор қабул қилиш керак бўлади, шунда бу тизим 2028 йилги мусобақадан бошлаб кучга кириши мумкин. Евро—2016 дан бошлаб иштирокчилар сони 16 тадан 24 тага оширилганди. Энди ташкилот 55 мамлакатдан иборат минтақанинг 32 иштирокчиси мусобақада қатнашишини хоҳламоқда.

Теннис

Новак Жокович Уимблдон финалида италиялик Маттео Берреттинини мағлуб этди. Сербиялик спортчи қаторасига учинчи марта Уимблдон чемпионига айланди. Бу Жокович учун 20-«Улкан тож» соврини бўлди. Бу борада серб Рожер Федерер ва Рафаэль Надалнинг рекордини такрорлади.

MMA

Ўзбекистон вақти билан 11 июль тонгида UFC 264 мусобақаси бўлиб ўтди. Оқшомнинг марказий жанги енгил вазн тоифаси вакиллари Конор Макгрегор ва Дастин Порье ўртасидаги кечди. Ушбу жанг бир раунд давом этди. Порьенинг доминантлигида ўтган раунд сўнгида Конор эҳтиётсиз ҳаракат сабаб оёғини синдириб олди ва жанг муддатидан аввал тугади. Шу тариқа Порье енгил вазн чемпиони Чарльз Oliveйра қарши чемпионлик жангида иштирок этиш ҳуқуқини қўлга киритди.