Евро—2020 финалида енгилмаслар тўқнашуви: «Мовий гвардия» «уч шерлар»га қарши

Бир ой давом этган Евро—2020 мусобақасининг финал ўйини 11 июль, якшанба куни бўлиб ўтади.

Мусобақа йўли

Аввалига Италиядан бу қадар юқори натижа кутилмаганди. «Скуадра аззура» гуруҳдан бемалол чиқиши, лекин плей-оффда мусобақани тарк этиши тахмин қилинганди. Италия эса ҳаммани ҳайрон қолдира бошлади. Гуруҳда 100 фоизлик натижа билан биринчи ўринни эгаллади. Финалга қадар қоқилмасдан етиб келди.

Англиянинг эса гуруҳдан чиқишиёқ томошабоп футбол мухлисларини ҳайрон қолдирди. Мухлислар футболни мафтункор ўйин сифатида интрига учун томоша қилади. Англия эса Евро—2020 да антифутбол кўрсатди, камига ярим финалда мухлисларда каттагина симпатия уйғотган Данияни шубҳали пенальти эвазига мағлуб этди.

Италия

Марко Верратти, Николо Барелла, Матео Пессина, Мануэль Локателли, Жоржиньо, Бриан Кристанте каби футболчилардан фақат учтаси майдонга тушади. Роберто Манчини қийин танлов орасида қолган. Рақибларнинг ярим ҳимоясида эса икки жангчи бор — Калвин Филлипс ва Деклан Райс. Лекин италияликлар ҳужумларининг 25 фоизини марказдан бошлаган бўлса, қолган барча ҳужумлари қанотлардан амалга оширилган.

Ҳозирча Швейцариядан бошқа бирорта жамоа Англиянинг марказий ярим ҳимоячиларини прессингда енга олмади. «Банкирлар» ўшанда иккинчи рақамда ҳаракат қилганди. Лекин италияликлардан буни кутиш мушкул. Италия иккинчи рақамда ўйнаса, нафақат натижага эриша олмайди, балки бутун бошли финални «ўлдириши» мумкин.

Англия

Англиянинг мусобақадаги юришини ёдга оладиган бўлсак, финал уларнинг ўзи учун ҳам кутилмаган бўлди.

Қандай бўлмасин Англия терма жамоаси ўйинларни назорат қила олди. Керак вақтда кучни тежади, керак вақтда ҳужумкор ўйин намойиш қилди. Гарет Саутгейтни мусобақа тугамасдан туриб энг яхши мураббий деб эълон қилса ҳам бўлади. У натижага эришиш учун турли услублардан фойдалана олди.

Евродаги 6 ўйиннинг фақат биттасини Англия терма жамоаси «Уэмбли»дан ташқарида ўтказди. Бундай омад бошқа бирорта жамоага насиб этмади. Финал ҳам ўша стадионда бўлиб ўтади.

Мураббийлар фикри:

Биз осон бўлмаган йўлни босиб ўтдик. Таътилга чиқиш учун яна бир қадам қолди. Англия нафақат ярим ҳимояда, балки бошқа позицияларда ҳам кучли. Улар финалга ўз-ўзидан чиқиб қолмади. Финалда доим кучли жамоалар ўйнайди. Мухлисларга тўла стадионда ажойиб ўйин гувоҳи бўламиз.Роберто Манчини, Италия терма жамоаси бош мураббийи

Италия охирги йилларда ажойиб футбол намойиш этяпти. Биз уларнинг ўйинини кузатдик. Уларга гол уриш доим қийин бўлган. Италия финалга лойиқ эди: финалга қадар Бельгия ва Испания каби юқори даражадаги жамоаларни мағлуб этди. Олдинда бизни катта синов кутиб турибди.

Гарет Саутгейт, Англия терма жамоаси бош мураббийи