Таниб бўлмас даражада макияж қиладиган визажист — Гоар Аветисяннинг ижод маҳсулини ўзида мужассам этган суратлар

Визажист сифатида нафақат Россия, балки бошқа мамлакатларда ҳам машҳур ҳисобланган Гоар Аветисян 4 июль куни 28 ёшни қаршилади. Британиянинг DailyMail нашри томонидан «Йилнинг энг яхши визажисти» деб эътироф этилган Гоарнинг семинар ва маҳорат дарсларини дунёнинг турли бурчакларидаги қизиқувчилар интиқиб кутади. Бир неча йил ичида бюти-империяга асос солишга муваффақ бўлган Аветисяннинг мижозлари орасида оддий одамлар, қолаверса, юлдузларни ҳам учратиш мумкин. Гоар оддий оилада дунёга келган. Муваффақиятга мустақил равишда эришган визажист буларнинг барини обуначиларидан беркитмайди.

«Ҳаммаси болалигимдан бошланган. 12 ёшимдан бошлаб ҳар куни бўянганман ва ота-онам бунинг учун мени калтаклаган. 15 ёшимда менга макияж учун пул тўлай бошлашган. Қачонлардир мени дунёда танишади деган ният билан хоҳловчиларни кун давомида узлуксиз пардоз қилганман. Тўғрисини айтганда, уйқусиз тунлар ва кун давомида арзимас чақа эвазига буларни бари бежиз эмас деб, 10-15 соатлаб макияж қилганимни эсласам юрагим сиқилади. Кейинроқ мени бутун Москвада таний бошлашди — макияж ва соч турмаги қилдириш учун ёзилган келинлар бу кунни орзиқиб кута бошлади. Аммо Instagram пайдо бўлиши билан дунёнинг турли мамлакатларидаги инсонлар ҳам мен ҳақимда била бошлади. Мана 8 йилдан буён макияждан дарс бераман (макияж техникам билан танишиш учун ҳар ой ернинг турли бурчакларидан талабалар олдимга учиб келади). Шу кунгача визажист сифатида ишлаётган бўлсам, менга муҳтож бўлган аёлларни бепул бўянтираман. Мен қизларни, айниқса, ўзига ишонмайдиган, ўзининг нақадар гўзал ва латофатли эканини аллақачон унутган қизларни ўзгартиришни яхши кўраман», — дейди Гоар.

Унинг ишларига назар ташлаб, нима учун аксарият аёллар Гоардек макияж қилишни исташини билиш мумкин.