Сувайш каналини тўсиб қўйган Ever Given контейнер ташувчи кемаси 7 июль куни сузиб кетиши мумкин. Бу ҳақда канал маъмуриятига таяниб, Reuters хабар берди.
Фото: Reuters
Канал раҳбариятининг қайд этишича, маъмурият ва кема эгалари товон пули масаласини ҳал қилди. Томонлар ўртасидаги келишув 7 июль куни имзоланади.
Аввалроқ Ever Given эгаси канал маъмуриятига 540 миллион доллар товон тўлаши маълум қилинганди. Таъкидланишича, ушбу келишувга Сувайш канали раҳбарияти кема эгасига нисбатан даъво миқдорини 916 миллион доллардан 540 миллион долларга камайтиргандан сўнг эришилган.
Эслатиб ўтамиз, 23 март куни Ever Given кемаси кучли шамол ва қум бўрони туфайли йўналишини ўзгартириб, бурун ва қуйруқ қисмлари билан иккала қирғоққа тиралиб қолиб, Сувайш каналининг бир магистралли жанубий қисмини тўсиб қўйган эди. Бунинг натижасида 450 дан ортиқ кемадан иборат тирбандлик юзага келган. Шунингдек, ҳодиса ортидан нефть нархи кескин ўсган.
Сувайш канали орқали икки йўналишда ҳам кемалар ҳаракати 29 март оқшомидан қайта тикланди. Саёзликдан чиқарилгандан бери Ever Given канал маъмурияти томонидан ушлаб турилибди.
Аввалроқ Сувайш каналининг тўсилиб қолиши оқибатида етган зарар 1 миллиард долларга баҳолангани ҳақида хабар берилганди. Канал маъмурияти бўлиб ўтган ҳодисада Ever Given кемаси капитанини айбдор деб атади. Кеманинг эгаси эса ишни судга оширмаслик учун зарарни қоплаб бермоқчилигини маълум қилди.
