Сизу бизга энг кўп ҳақ тўланадиган актёр ва актрисалар, шунингдек, ўтган йилларда ким энг кўп пул топгани ҳақидаги маълумотлар янгилик эмас. Масалан, 2020 йилда энг кўп пул тўланадиган киносаноат вакиллари орасида Дуэйн Жонсон ва София Вергара етакчилик қилган. Шундан келиб чиқиб кўпчилик кимга энг кўп маблағ тўланса, ўша энг бадавлат актёр бўлади, деб ҳисоблайди. Аммо қанчалик ғалати туюлмасин бундай эмас. Масалан AdMe.ru нашридагилар ҳам энг давлатманд актёрни кўпчилик танийди деб ўйлаган, аммо энг бадавлат санъат олами вакили Дуайн Жонсон, Жонни Депп, Ди Каприо ва Жорж Клуни эмас, исми кўпчиликка номаълум бўлган актёр бўлиб чиққан.
2021 йилнинг июнида Cеоwоrld журналида энг бадавлат инсонлар рўйхати эълон қилинган. Рейтингдан сўнгги вақт давомида кўп пул ишлаб топган ҳамда бутун фаолияти давомида катта давлат тўплаган актёр ва актрисалар ўрин олган.
Унда молиявий аҳволи 1 миллиард долларга баҳоланган Тайлер Перри биринчи, 950 миллион доллар маблағ эгаси бўлган америкалик актёр ва сценарий муаллифи Жерри Сайнфелд эса иккинчи ўринга лойиқ деб топилган. Учинчи ўриндан эса даромади 300 миллион доллардан ортиқ бўлган Болливуд юлдузи Шоҳрух Хон ўрин олган.
Том Круз 580 миллион доллар билан тўртинчи бўлган. Кейин эса даромади 500 миллион доллар бўлган актёрлар бирин-кетин ўрин эгаллаган. Жорж Клуни, Роберт Де Ниро ва The Оlsin Twins Топ-7дан ўрин олган. Амитабҳ Баччан (455 миллион доллар) саккизинчи, Мел Гибсон (425 миллион доллар) эса тўққизинчи бўлган. Адам Сендлер (420 миллион доллар) ўнталик рўйхатга якун ясаган.
Актёр қандай қилиб бунча катта миқдорда пул ишлаб топган?
https://www.instagram.com/p/B2kk6AiH03w/?utm_source=ig_embed&ig_rid=7efbbbec-821d-47d6-946d-d8296e5d8437
Асл исми Кичик Эммит Перри бўлган актёр 1969 йил Луизиана штатининг Янги Орлеан шаҳрида дурадгорлар оиласида дунёга келган. Ота-онаси билан муносабатлари бироз мураккаб бўлган йигит мустақил ҳаёт бошлашга ҳаракат қилган ва 16 ёшида исмини Тайлер Перрига ўзгартирган.
Бўлажак миллиардер мактабни битирмаганига қарамай, ўрта мактаб билимини ўзлаштирганлик ҳақида сертификатни қўлга киритган. Узоқ вақтлар давомида оиласи билан боғлиқ қийин муносабатлар сабаб ўзини ўнглаб ололмаган Тайлернинг ҳаёти Опра Уинфри шоусидаги ёзишнинг даво сингари таъсир қилиши мумкинлиги ҳақида айтилган фикрларни эшитганидан кейин буткул ўзгариб кетган. Айнан шу нарса Перрининг ёзишни бошлаши, «Мени ўзгартиришганини биламан» мюзиклини яратиши учун туртки бўлган.
22 ёшида у машина савдоси ва коллектор бўлиб ишлаш ортидан 12 минг доллар тўплашга муваффақ бўлган. 1990 йилда ўз жамғармасини «Мени ўзгартиришганини биламан» мюзикли Атланта театрида қўйилиши учун сарфлаган. Постановка кутилгандек омадли чиқмаган, молиявий муваффақият ҳақида эса гап бўлиши ҳам мумкинмас эди. Ҳатто турар жойи ижарасига пул топа олмаганидан машинада яшашига тўғри келган.
Омадсизликлар Перрининг тўхташи учун сабаб бўлмаган. Кейинги 6 йил давомида сценарий ёзиш ва уларни саҳналаштиришдан чарчамаган, охир-оқибат 1998 йилга келиб эътирофларга сазовор бўлган. Атлантанинг иккита театрида мюзиклнинг муваффақиятли намойишларидан кейин спектакллар ташкил қилиш ва шаҳар театрларида гастрол қилишда давом этган. Намойиш қанча кўп бўлгани сари мухлислари сони ҳам шунча кўпаяверган.
2005 йилда Forbes’да Тайлер Перри чипталарни 100 миллион долларга, спектакль видеоларини 30 миллион долларга сотгани ва қўшимча 20 миллион долларга эга бўлгани ҳақида маълумот эълон қилинган. Йилига 300 марта спектакль намойиш қилган, уларни ҳафта давомида 35 минг томошабин томоша қилган. 2005 йилда эса ижросидаги «Телба қора аёл кундалиги» номли дебют фильми экран юзини кўрган. Танқидчилар ижобий баҳо бермаганига қарамай, у гавдалантирган қаҳрамон мухлислар қалбидан жой олган. Турли лойиҳаларда доимий равишда фаол бўлган актёр продюсер ва сценарий муаллифи сифатида ҳам фаолият юритган. 2007 йилда ижросидаги «Отасининг қизи» фильмининг премьераси бўлиб ўтган. Шу йилнинг октябрида прокатларда 21,4 миллион доллар тўпланишига сабаб бўлган «Нима учун турмуш қурамиз?» лойиҳаси намойиш қилинган. 2009 йилда суратга тушган «Медея қамоқхонада» фильми эса 90,5 миллион доллар йиғган. Шундай қилиб 2009 йилга келиб у барча лойиҳаларидан жами 400 миллион доллар ишлаб топишга муваффақ бўлган. 2011 йилда аввалига театрда кейин эса кинотеатрларда «Медеянинг катта, бахтли оиласи» фильми намойиш қилинган.
Шундан кейин актёр асосий қаҳрамони Медея бўлган яна 6 та фильм суратга олган ва уларнинг барида бош қаҳрамонни гавдалантирган. Киносаноатдаги хизматлари сабаб 2019 йил Голливуддаги Шон-шараф хиёбонида ўз юлдузига, 2021 йилда эса «Оскар» мукофотига эга бўлган.
Танқидчилар томонидан ишларига етарли баҳо берилмагани сабаб аввалига киносаноатда тан олинмаган актёр ҳеч қачон ортга чекинмаган ва ўзи ёқтирган иши билан шуғулланишда давом этган. Бугунги кунда 51 ёшли актёрнинг ўз ижод студияси ва 1200 та телевизион эпизод, 22 та бадиий фильм ҳамда 20 та театр постановкасига муаллифлик ҳуқуқи бор. Шунга қарамай, Перрининг шулар билан чекланиш нияти йўқ. Актёр ресторан, дўкон ва боғ очишни режалаштирган. Қолаверса, стриминг платформаси билан шартнома имзолаган, унга кўра йилига камида 90 қисмни ташкил қиладиган янги телевизион лойиҳа суратга олиши керак.
Нима учун Перри ҳақида ҳеч ким эшитмаган?
Фақат ўз мамлакатида машҳурликка эришиши ва бошқалар уни танимаслигининг сабаби у суратга оладиган фильмларнинг маҳаллий ўзига хосликларни ўзида мужассам этадиган комедия жанрида эканлигида. Шу туфайли унинг фильмлари мамлакатдан ташқарида намойиш қилинмайди.
Изоҳ (0)