Daxlsizlik huquqidan mahrum etilgan Andijon shahar deputati qamoqqa olindi
Xalq deputatlari Andijon shahar kengashining 2021-yil 17-may kuni o‘tkazilgan navbatdagi sessiyasida Andijonda yer sotuvchilarning kirdikorlarini fosh qilib yurgani uchun prokuror taqdimnomasiga ko‘ra daxlsizlik huquqidan mahrum qilingan deputat Shuhrat Karimov qamoqqa olindi. Bu haqda “Daryo”ga O‘zLiDeP partiyasi Andijon shahar kengashi apparat rahbari, shahar kengashi deputati Jahongir Jiyanov ma’lum qildi.
Ma’lum bo‘lishicha, Jinoyat ishlari bo‘yicha Izboskan tumani sudining 2021-yil 23-iyundagi ajrimiga muvofiq Jinoyat kodeksining 168-moddasi (firibgarlik) 3-qismi “b” bandi va boshqa moddalar bilan gumon qiluvchi Andijon shahrida yashovchi fuqaro Shuhrat Karimovga nisbatan qamoqqa olish ehtiyot chorasi qo‘llanilgan.
Jahongir Jiyanovning aytishicha, 2021-yilning 20-iyun kuni ijtimoiy tarmoqlarda “Deputat 40 daqiqada Andijon shahar hokimining barcha kirdikorlarini fosh qildi” sarlavhasi bilan Shuhrat Karimovning intervyusi joylashtirilgan. Shundan so‘ng ushbu holatlar yuz bergan.
Avvalroq Xalq deputatlari Andijon shahar kengashining navbatdagi sessiyasida bir guruh deputatlar tintuvdan o‘tkazilgani, ushbu sessiyada Andijonda yer sotuvchilarning kirdikorlarini fosh qilib yurgan deputatni prokuror taqdimnomasiga ko‘ra, daxlsizlik huquqidan mahrum qilingani ma’lum qilingandi.
Shuhrat Karimov “Daryo” muxbiriga bergan intervyusida u xalq deputatlari Andijon shahar kengashiga 9-Sa’diy saylov okrugidan saylangan deputat sifatida qonun va qonunosti hujjatlar ijrosini xalqqa yetkazish va ijrosini nazorat qilishga harakat qilgani, shu sababli bir qator tashkilotlarga tegishli tartibda deputatlik so‘rovlarini yuborgan, bu esa mutasaddilarga yoqmaganini bildirgandi.
Andijon shahar hokimi Bahrom Haydarov esa deputat Shuhrat Karimov o‘ziga ajratilgan to‘rt gektar yer maydoni atrofidagi qo‘shimcha olti gektarni ham noqonuniy qo‘shib olgani, o‘ziga biriktirilgan yerdan ko‘p qavatli uylar, kottejlar, maishiy xizmat binolari qurishi kerak bo‘lgan bo‘lsa-da, belgilangan ishlar amalga oshirilmagani ta’kidlagan.
Eslatib o‘tamiz, Korrupsiyaga qarshi kurashish agentligi prokurorning bunday harakatini “oqlab bo‘lmasligi”ni ma’lum qilib, prokuror korrupsiya holati haqida xabar bergan shaxsni himoya qilishi kerakligini ta’kidlagandi.
Bundan tashqari, daxlsizlik huquqidan mahrum qilingan deputat ishi yuzasidan Andijon viloyati deputatlari bu holatga o‘z e’tirozini bildirib Prezidentga murojaat qilgandi.
