Ўзбекистон мудофаа вазири раҳбарлигида барча куч тузилмалар иштирокида ўтказилган машғулотларда бўлинмаларнинг ҳамкорликдаги ҳаракати, жанговар шайлиги синовдан ўтказилди. Бу ҳақда вазирлик матбуот хизмати «Дарё»га маълум қилди.
Маълум қилинишича, қўққисдан ўтказилаётган текширувда авиация, артиллерия ва батальон тактик гуруҳларининг жанговар шайлиги текширилган. Машқ шартига асосан бўлинмалар шахсий таркибига чегарани кесиб ўтган шартли душманни йўқ қилиш вазифаси юклатилган. Унга кўра Жануби-ғарбий махсус ҳарбий округининг бўлинмаларига «Йиғин» сигнали берилган.
Берилган жанговар топшириққа асосан бир пайтнинг ўзида бу ерда ҳам авиация мутахассислари томонидан учиш аппаратлари жанговар шай ҳолатга келтирилган. Жануби-ғарбий махсус ва Тошкент ҳарбий округлари, Ҳаво ҳужумидан мудофаа қўшинлари ва Ҳарбий ҳаво кучларига қарашли бўлинмалар билан кенг маштабда ўтказилаётган ушбу тактик ўқув машғулотлари реал вазиятларга яқинлаштирилган ҳолда олиб борилган.
«Термиз» дала ўқув майдонига етиб келган ҳарбий хизматчилар зудлик билан қўриқловни ташкил этиш, юқори қўмондонлик билан алоқани таъминлаш, учувчисиз учиш аппаратлари кўмагида чегараолди ҳудудларида ҳавода ва ерда разведка қидирув ишларини олиб бориш, шартли душман жойлашган ҳудуд, куч воситалари, шахсий таркибининг сони, қурол-аслаҳалари хусусида тўлиқ маълумотлар тўпланиб, ҳужум режаси ишлаб чиқилган.
Бўлинма командирлари томонидан ностандарт вазиятларда қабул қилинган кескин қарорга асосан дастлаб батальон тактик гуруҳларини ҳаводан қўллаш мақсадида Ҳаво ҳужумидан мудофаа қўшинлари ва Ҳарбий ҳаво кучларининг авиация бўлинмалари ҳаракатга келтирилган.
Жараёнларни мудофаа вазири, генерал-лейтенант Баҳодир Қурбонов бевосита кузатиб борган. Мудофаа вазири «Су-25» қирувчи самолётида уни моҳирлик билан бошқараётган ҳарбий учувчилар билан бирга шартли душман жойлашган ҳудудга кетма-кет авиация зарбалари берилишида иштирок этган.
Кадрлардан кўриш мумкинки, шу пайтнинг ўзида «Ми-35» вертолётлари шартли душманнинг жанговар техникаларни йўқ қилишга киришган.
Аввалроқ Мудофаа вазирлиги Ўзбекистон армиясининг жанговар шайлигини текширишни бошлагани тўғрисида хабар берилганди.
Изоҳ (0)