Ўзбекистонда 25 июнь куни коронавирус инфекциясини юқтириб олиш билан боғлиқ 546 та янги ҳолат рўйхатга олинди — бу кунлик касалланиш бўйича 2021 йилнинг энг юқори кўрсаткичидир. Бундан аввалги антирекорд 24 июнь куни қайд этилган, ўшанда 476 кишида COVID-19 тасдиқланган. Шундай қилиб, мамлакатда коронавирусга чалингани расман тан олинганлар сони 108 730 нафарга етди.

Янги касалланиш ҳолатларининг

  • 12 нафари Қорақалпоғистон Республикасида,
  • 13 нафари Андижон вилоятида,
  • 20 нафари Бухоро вилоятида,
  • 21 нафари Жиззах вилоятида,
  • 10 нафари Қашқадарё вилоятида,
  • 6 нафари Навоий вилоятида,
  • 8 нафари Наманган вилоятида,
  • 90 нафари Самарқанд вилоятида,
  • 11 нафари Сирдарё вилоятида,
  • 30 нафари Сурхондарё вилоятида,
  • 32 нафари Фарғона вилоятида,
  • 35 нафари Хоразм вилоятида,
  • 94 нафари Тошкент вилоятида,
  • 164 нафари Тошкент шаҳрида

коронавирусга чалинган беморлар билан мулоқотда бўлганлиги сабабли намуна олинган фуқаролар орасида аниқланган.

Вазирликнинг маълум қилишича, сўнгги суткада 454 нафар бемор соғайди. Жумладан, Қорақалпоғистонда 13 нафар, Бухорода 30 нафар, Жиззахда 15 нафар, Қашқадарёда 9 нафар, Навоийда 2 нафар, Самарқандда 45 нафар, Фарғонада 16 нафар, Хоразмда 9 нафар, Тошкент вилоятида 41 нафар ҳамда Тошкент шаҳрида 274 нафар бемор тузалиб, касалликдан соғайганлар жами 104 461 нафарга етди ва соғайиш кўрсаткичи 96 фоизни ташкил этмоқда.

Шунингдек, 2 нафар коронавирусга чалинган бемор вафот этиб, касалликдан вафот этганлар сони 727 нафарни ташкил қилмоқда. Айни пайтда тиббиёт муассасаларида 3542 нафар бемор даволаняпти.

Эслатиб ўтамиз, Ўзбекистонда 28 июндан карантин чекловлари кучайтирилади. Тошкент шаҳрига 28 июндан транспорт воситалари киришига ҳамда кўнгилочар ва овқатланиш объектлари фаолиятига чекловлар ўрнатилади. Бундан ташқари, Тошкентда 18 ёшдан ошганлар 28 июндан коронавирусга қарши оммавий эмланади.