Испанияда коронавирус пандемияси сабабли жорий қилинган кўчада ҳимоя ниқобларини тақиш мажбурияти 26 июндан бекор қилинди, деб ёзади «РБК».

Фото: Reuters

Мамлакат бош вазири Педро Санчес ўтган ҳафта эпидемиологик чораларни юмшатиш тўғрисидаги қарорни эълон қилди. Ушбу қарор Испания Вазирлар Маҳкамаси ва Соғлиқни сақлаш вазирлиги томонидан тасдиқланди.

Соғлиқни сақлаш вазири Каролина Дариаснинг сўзларига кўра, фуқаролар 1,5 метр ижтимоий масофани сақлаш шарти билан очиқ ҳавода ниқоб тақиши шарт эмас. Бироқ савдо кўчалари сингари гавжум жойларда ёки катта тадбирларда ниқобдан фойдаланиш керак бўлади.

Шу билан бирга, барча ёпиқ жамоат жойларида, жумладан, дўконлар, кинотеатрлар, театрлар, кутубхоналар ва музейларда ниқоб тақиш мажбурий бўлиб қолмоқда. Бу қоида жамоат транспортида ҳам амал қилади.

The Local нашрининг таъкидлашича, кўчада ниқоб тақиш мажбурияти бутун Испания бўйлаб бекор қилинган бўлса-да, ҳудудлар вазиятга қараб ўзлари қарор қилиши мумкин. Масалан, Андалузия ва Астурия ҳукумати очиқ ҳавода ҳам ниқоб тақишни давом эттиришни тавсия қилди.

Испания ҳукумати фуқароларга 2020 йил баҳорида жамоат жойларида ниқоб тақишни буюрганди. 2021 йил март ойида одамлар орасидаги масофадан қатъи назар, кўчада ҳимоя ниқобларини тақиш талаби кучайтирилди.

Жонс Ҳопкинс университети маълумотларига кўра, Испанияда пандемия бошидан бери 3,7 миллион киши COVID-19’га чалинган, шулардан 80,7 минг киши касалликдан вафот этган. The Local нашрининг ёзишича, июнь ойи ўрталарига келиб, мамлакат аҳолисининг 47 фоизи коронавирусга қарши вакцинанинг камида битта компоненти билан эмланган. Нашрнинг таъкидлашича, ҳозир мамлакатда касалланиш даражаси 2020 йилнинг августидан буён энг паст кўрсаткичда.