Buxoroda Xitoy fuqarosining 60 ming dollar, 20 ming yuan va 56 mln so‘m pullarini o‘g‘irlagan shaxslar ushlandi

Buxoro viloyati Romitan tumanida Xitoy fuqarosining juda ko‘p miqdorda pullarini o‘g‘irlagan shaxslar qo‘lga olindi. Bu haqda Buxoro viloyati IIB matbuot xizmati xabar qildi.

Romitan tumani IIB huzuridagi tergov bo‘linmasi tomonidan berilgan ma’lumotga ko‘ra, 2021-yilning 21-iyun kuni soat 20:00 dan 22-iyun kuni soat 06:00 ga qadar bo‘lgan vaqt oralig‘ida noma’lum shaxs Qoqishtuvon qishlog‘ida joylashgan, Xitoy fuqarosi 1976-yilda tug‘ilgan V.B. rahbarlik qilib kelayotgan Xitoyning yo‘l qurilish korxonasi idorasi joylashgan binoga g‘ayriqonuniy ravishda kirib, u yerdan seyf va ushbu seyf ichida bo‘lgan 60 000 AQSh dollari, 20 000 Xitoy yuani va 56 million so‘m pullarni yashirin ravishda o‘g‘irlab, hodisa joyidan noma’lum tomonga yashiringan.

Mazkur holat yuzasidan kelib tushgan xabar asosida zudlik bilan jinoyat ishi qo‘zg‘atilib, viloyat Ichki ishlar boshqarmasi boshlig‘ining birinchi o‘rinbosari podpolkovnik Mansur Qodirov hamda tergov bo‘yicha o‘rinbosar polkovnik Oqil Hasanov rahbarligida Ichki ishlar boshqarmasi hamda tuman ichki ishlar bo‘limi xodimlaridan iborat tarkibda tergov-tezkor guruhi tuzilib, kechiktirib bo‘lmas surishtiruv hamda tergov harakatlari o‘tkazilishi natijasida jinoyat fosh etildi.

Ushbu jinoyatni Romitan tumani “Qoqishtuvon” mahallasida yashovchi, 1984-yilda tug‘ilgan P.S. va uning mahalladoshi 1974-yilda tug‘ilgan X.U. bir guruh bo‘lib, oldindan jinoiy til biriktirib sodir etganliklari aniqlanib, gumon qilinuvchilardan ashyoviy dalillar tegishli tartibda hujjatlashtirib olindi va jabrlanuvchi V.B. rahbarlik qilib kelayotgan Xitoyning yo‘l qurilish korxonasiga yetkazilgan moddiy zarar to‘liq qoplandi.

Hozirda gumon qilinuvchilarga nisbatan Jinoyat kodeksining 169-moddasi 4-qismi “a” bandi (juda ko‘p miqdorda o‘g‘rilik) bilan qo‘zg‘atilgan jinoyat ishi bo‘yicha qamoqqa olish tarzidagi ehtiyot chorasi qo‘llanilib, dastlabki tergov harakatlari davom ettirilmoqda.

Bundan avval Farg‘onada qaynonasining tilla taqinchoqlarini o‘g‘irlagan kelinga jinoyat ishi qo‘zg‘atilgani, Namanganda uch kishining jami 50 million so‘mlik qoramollarini o‘g‘irlagan o‘quvchilarga nisbatan jinoyat ishi qo‘zg‘atilgani hamda Farg‘onadagi bozorda o‘zganing sumkasidan pul va telefon o‘g‘irlagan 36 yoshli ayol ushlangani haqida xabar berilgandi.