«Юксалиш» умуммиллий ҳаракати «Эзгу амал» жамоат фонди ва Ўзбекистон волонтёрлар ассоциацияси билан ҳамкорликда саратон билан курашаётган болалар учун ўтказилган «Эзгу амал» хайрия марафони доирасида 230 миллион сўмга яқин маблағ тўпланди. Бу ҳақда 11 майдан 9 июнга қадар давом этган марафон якунларига бағишланган матбуот анжуманида маълум қилинди.
Саратонга чалинган ва даволанишнинг турли босқичларида бўлган беморларга ёрдам кўрсатиш, айниқса, болалар орасида саратон касалликларини эрта аниқлаш ва ўз вақтида даволашга жамоатчилик эътиборини жалб этишни мақсад қилган онлайн марафон доирасида бемор болалар учун хайрия қилишни истаган инсонлардан 229,68 миллион сўм маблағ келиб тушган.
Жумладан, Payme, Paynet, Click, Apelsin тўлов тизимлари орқали 127,08 миллион сўмдан ортиқ, «EzguAmal.org» сайти орқали 35,6 миллион сўмдан зиёд, юридик шахслардан эса ҳисоб рақам орқали 67 миллион сўм хайрия пуллари ўтказилган.
Ушбу маблағларнинг
- 189,14 миллион сўми болаларни кўрикдан ўтказиш ва дорилар учун,
- 25,53 миллион сўми кўнгилочар тадбирлар ва концертлар ташкиллаштиришга,
- 15 миллион сўми лойиҳа маркетингига
Хайрия маблағларини ўтказиш истагидагиларга қулайлик яратиш, улар пулнинг мақсадли ва манзилли тақсимланишини кузата олишлари учун маблағлар илк бор интернет-эйкваринг тизими орқали тўпланди. Маблағлар қандай тақсимланаётганини «EzguAmal.org» сайти орқали бевосита кузатиш мумкин бўлди.
«Эзгу амал» фонди васийлик кенгаши раиси Мунира Хўжахонованинг сўзларига кўра, ёрдам кўрсатилган беморларнинг аксарияти Тошкент, Бухоро, Қашқадарё, Сурхондарё, Андижон, Наманган, Самарқанд вилоятларидан.
Маълумотларга кўра, Ўзбекистонда 2020 йилда 884 болада хавфли ўсимта касаллиги, 402 болада гематологик касалликлар бирламчи қайд этилган. 4 505 бола саратон, 2 396 бола қон касалликлари бўйича диспансер ҳисобида туради.
Онкологик касалликлар структурасида болалар онкологияси 3,7, лейкозлар 19,1, бош мия ва орқа мия ўсимталари 17,5, буйрак ўсимталари 7,6, суяк, бўғим хавфли ўсимталари 5,6 фоизни ташкил этади.
Тадбирда ёрдам кўрсатилган бемор болалар ҳам ота-оналари билан бирга иштирок этди. Оқ қон ташхиси қўйилган 13 ёшли Дилшода Жўраеванинг отаси унинг қизига марафонда йиғилган маблағлар ҳисобидан 6,2 миллион сўм ажратилганини маълум қилди. Қизалоққа энди ҳар бири 2 миллион сўм турадиган тўртта дори учун яна ёрдам зарур.
Ўтган вақт давомида давлат томонидан кимё препаратлари учун 5,5 миллион доллар, қон касалликлари беморларини даволаш учун 23,8 миллиард сўм маблағ ажратилди.
Ўзбекистон волонтёрлар ассоциацияси раиси Ширин Обидованинг таъкидлашича, бу маблағлар касалликни тўлиқ енгишда етарли эмас, «онкологик касалликларга қарши курашиш фақатгина давлатнинг иши бўлиб қолмасдан, жамиятнинг елкасида ҳам масъулият бўлиши керак».
«Саратон — ҳукм эмас, уни енгиш мумкин. Марафон ўз фаолиятини кейинги босқичларда давом эттираверади. Ҳомийлар ва хайрия қилишни истаганларни тўхтамасликка чақирамиз», — дея қўшимча қилди Обидова.
Маълумот ўрнида, 2021 йилнинг 27 май куни «Аҳолига гематология ва онкология хизматларини кўрсатиш тизимини янада такомиллаштириш тўғрисида»ги Президент қарори қабул қилинган эди.
Қарорга биноан, онкология хизматини ривожлантириш билан боғлиқ харажатлар учун давлат бюджетидан 2021 йилда қўшимча 60 миллиард сўм, 2022 йилдан бошлаб 125 миллиард сўмдан кам бўлмаган миқдорда маблағ ажратилиши белгиланган.
Изоҳ (0)