“Yuksalish” umummilliy harakati “Ezgu amal” jamoat fondi va O‘zbekiston volontyorlar assotsiatsiyasi bilan hamkorlikda saraton bilan kurashayotgan bolalar uchun o‘tkazilgan “Ezgu amal” xayriya marafoni doirasida 230 million so‘mga yaqin mablag‘ to‘plandi. Bu haqda 11-maydan 9-iyunga qadar davom etgan marafon yakunlariga bag‘ishlangan matbuot anjumanida ma’lum qilindi.
Saratonga chalingan va davolanishning turli bosqichlarida bo‘lgan bemorlarga yordam ko‘rsatish, ayniqsa, bolalar orasida saraton kasalliklarini erta aniqlash va o‘z vaqtida davolashga jamoatchilik e’tiborini jalb etishni maqsad qilgan onlayn marafon doirasida bemor bolalar uchun xayriya qilishni istagan insonlardan 229,68 million so‘m mablag‘ kelib tushgan.
Jumladan, Payme, Paynet, Click, Apelsin to‘lov tizimlari orqali 127,08 million so‘mdan ortiq, “EzguAmal.org” sayti orqali 35,6 million so‘mdan ziyod, yuridik shaxslardan esa hisob raqam orqali 67 million so‘m xayriya pullari o‘tkazilgan.
Ushbu mablag‘larning
- 189,14 million so‘mi bolalarni ko‘rikdan o‘tkazish va dorilar uchun,
- 25,53 million so‘mi ko‘ngilochar tadbirlar va konsertlar tashkillashtirishga,
- 15 million so‘mi loyiha marketingiga
Xayriya mablag‘larini o‘tkazish istagidagilarga qulaylik yaratish, ular pulning maqsadli va manzilli taqsimlanishini kuzata olishlari uchun mablag‘lar ilk bor internet-eykvaring tizimi orqali to‘plandi. Mablag‘lar qanday taqsimlanayotganini “EzguAmal.org” sayti orqali bevosita kuzatish mumkin bo‘ldi.
“Ezgu amal” fondi vasiylik kengashi raisi Munira Xo‘jaxonovaning so‘zlariga ko‘ra, yordam ko‘rsatilgan bemorlarning aksariyati Toshkent, Buxoro, Qashqadaryo, Surxondaryo, Andijon, Namangan, Samarqand viloyatlaridan.
Ma’lumotlarga ko‘ra, O‘zbekistonda 2020-yilda 884 bolada xavfli o‘simta kasalligi, 402 bolada gematologik kasalliklar birlamchi qayd etilgan. 4 505 bola saraton, 2 396 bola qon kasalliklari bo‘yicha dispanser hisobida turadi.
Onkologik kasalliklar strukturasida bolalar onkologiyasi 3,7, leykozlar 19,1, bosh miya va orqa miya o‘simtalari 17,5, buyrak o‘simtalari 7,6, suyak, bo‘g‘im xavfli o‘simtalari 5,6 foizni tashkil etadi.
Tadbirda yordam ko‘rsatilgan bemor bolalar ham ota-onalari bilan birga ishtirok etdi. Oq qon tashxisi qo‘yilgan 13 yoshli Dilshoda Jo‘rayevaning otasi uning qiziga marafonda yig‘ilgan mablag‘lar hisobidan 6,2 million so‘m ajratilganini ma’lum qildi. Qizaloqqa endi har biri 2 million so‘m turadigan to‘rtta dori uchun yana yordam zarur.
O‘tgan vaqt davomida davlat tomonidan kimyo preparatlari uchun 5,5 million dollar, qon kasalliklari bemorlarini davolash uchun 23,8 milliard so‘m mablag‘ ajratildi.
O‘zbekiston volontyorlar assotsiatsiyasi raisi Shirin Obidovaning ta’kidlashicha, bu mablag‘lar kasallikni to‘liq yengishda yetarli emas, “onkologik kasalliklarga qarshi kurashish faqatgina davlatning ishi bo‘lib qolmasdan, jamiyatning yelkasida ham mas’uliyat bo‘lishi kerak”.
“Saraton — hukm emas, uni yengish mumkin. Marafon o‘z faoliyatini keyingi bosqichlarda davom ettiraveradi. Homiylar va xayriya qilishni istaganlarni to‘xtamaslikka chaqiramiz”, — deya qo‘shimcha qildi Obidova.
Ma’lumot o‘rnida, 2021-yilning 27-may kuni “Aholiga gematologiya va onkologiya xizmatlarini ko‘rsatish tizimini yanada takomillashtirish to‘g‘risida”gi Prezident qarori qabul qilingan edi.
Qarorga binoan, onkologiya xizmatini rivojlantirish bilan bog‘liq xarajatlar uchun davlat budjetidan 2021-yilda qo‘shimcha 60 milliard so‘m, 2022-yildan boshlab 125 milliard so‘mdan kam bo‘lmagan miqdorda mablag‘ ajratilishi belgilangan.
Izoh (0)