Ўзбекистон ТуркПАга аъзо бўлиш тўғрисида қарор қабул қилди
Ўзбекистон Туркий тилли давлатлар парламент ассамблеясига (ТуркПА) аъзо бўлиш тўғрисида қарор қабул қилди. Бу ҳақда Сенат раисининг биринчи ўринбосари Содиқ Сафоевга таяниб, Anadolu агентлиги хабар берди.
Маълум қилинишича, Тошкентда Олий Мажлис Сенати раисининг ўринбосари ТуркПА делегацияси билан учрашув ўтказган. Туркия парламенти депутати Исмет Учма бошчилигидаги делегация таркибида Қозоғистон, Қирғизистон ва Туркия парламентарийлари ҳам ташриф буюрган.
Томонлар Туркий давлатлар кенгаши аъзолари ва Ўзбекистон ўртасидаги икки томонлама муносабатлар, шунингдек, ТуркПА ва Ўзбекистон парламенти ўртасидаги ҳамкорликни ривожлантириш масалаларини муҳокама қилган.
Таъкидланишича, Содиқ Сафоев Ўзбекистонда келажакда ТуркПАга қўшилиш бўйича қарор қабул қилган.
Маълумот учун, ТуркПА (2008 йилда ташкил этилган) мамлакатлар парламентлари ўртасидаги мулоқотни ривожлантиришга қаратилган. Ассамблея томонидан қабул қилинадиган барча қарорлар фақат тавсиявий характерга эга. Озарбайжон, Туркия, Қозоғистон ва Қирғизистон давлатлари ТуркПА аъзолари ҳисобланади.
Эслатиб ўтамиз, 2021 йилнинг 31 март куни Шавкат Мирзиёев Туркий тилли давлатлар ҳамкорлик кенгашининг норасмий саммитида иштирок этиб, ўз нутқида мустаҳкам тарихий ришталар, муштарак тил, маданият ва маънавий қадриятлар асосида шаклланган Туркий тилли давлатлар ҳамкорлик кенгаши минтақавий ҳамкорликнинг самарали механизмига айланиб бораётганини алоҳида таъкидлаганди.
