Ижтимоий тармоқларда Мюнхен шаҳридаги автомобиль йўлида содир бўлган йўл-транспорт ҳодисасининг сурати тарқалди. Кадрда Alonso Edition номи билан танилган қизил Ferrari 599 GTB 60F1 тасвирланган. Ноёб суперкар ҳайдовчиси ҳўл йўлда бошқарувни эплай олмай, аварияга учраган, деб хабар беради Motor.
Фото: Instagram / Muc.collector
Ferrari 599 GTB 60F1 модели Италия маркасининг «Формула-1»даги 60 йиллиги муносабати билан ишлаб чиқарилган. Пойга машинасида биринчи бор Хосе Фройлан Гонсалес Британиянинг Силверстоунида ўтказилган мусобақада чемпион бўлган. Орадан 60 йил ўтгач, Фернандо Алонсо Ferrari рулида Буюк Британиядаги Гран-при ғолибига айланган. Испаниялик автопойгачининг ғалабаси муносабати билан компания Alonso Edition номли 40 нусха ноёб суперкарни яратган.
Ferrari 599 GTB 60F1 ўша вақтдаги «Формула-1»нинг икки хил рангдаги экстерери билан фарқланган. Суперкарлар марканинг Scuderia спорт бўлинмасининг ёрлиғига, орқа спойлер ва олмос билан ишлов берилган ғилдирак дискаларига эга бўлган. Муҳандислар машина интерьерини алкантара билан қоплаган. Машинанинг ҳар бирига шахсан Хосе Фройлан Гонсалес ва Фернандо Алонсонинг ўзи имзо чеккан.
Мазкур суперкар нима сабабдан аварияга учрагани номаълум. Суратларга кўра, Ferrari ҳайдовчиси ҳўл йўлда бошқарувни эплай олмай, йўл четидаги тўсиққа урилган. Зарба оқибатида автомобилнинг олд кузови, шунингдек, йўловчи томонига жиддий шикаст етган. Машина қайта тикланишга яроқсиз ҳолга келиб қолган, шу сабабли дунёда чекланган миқдордаги Ferrari’лар сони яна биттага камайган.
Аввалроқ германиялик эркак бир йил кутган Ferrari’сини харид қилганидан олти соат ўтиб аварияга учрагани тўғрисида хабар берилганди.
Мавзуга доир: Видео: «Мойка»дан чиқиши билан авария учраган Ferrari
