Президент Шавкат Мирзиёев Андижон шаҳрида бўлиб ўтган йиғилишда вилоят аҳолисининг турмуш шароитларини яхшилаш, ижтимоий инфратузилмани ривожлантириш масалаларига алоҳида эътибор қаратди.
Foto: “Daryo” / Madina Nurman
Вилоятда улкан бунёдкорлик ва ободонлаштириш ишлари олиб борилмоқда. 2021 йилда 271 та кўп қаватли, шунингдек, ипотека асосида 2 минг 500 та якка тартибдаги уй қурилмоқда. Шулардан 2 минг 710 та хонадонга субсидия ажратилади.
2021 йил 460 километр ичимлик суви, 1 минг 147 километр электр узатиш тармоқлари қурилиши ва таъмирланиши қайд этилди.
2021 йил 30 та мактаб таъмирланади. Математика, кимё-биология, информатика ва ахборот технологияларига ихтисослашган 13 та мактаб фаолияти ташкил этилади.
4 та оилавий поликлиника ва 9 та оилавий шифокорлик пункти ташкил этиш бўйича топшириқ берилди. Вилоятда 1 миллион 500 минг аҳолини тиббий кўрикдан ўтказиш, жумладан, 300 мингдан ортиқ аёлларни маммографик ва ультратовуш текширувларидан ўтказиш муҳимлиги таъкидланди.
Мураккаб операцияларга муҳтож, эҳтиёжманд аҳолига ёрдам бериш бўйича вилоятда махсус жамғарма ташкил этиш ташаббуси билдирилди.
Ёшлар ва аёллар муаммоларини тизимли ҳал қилиш, уларни касбга ўргатиш ва иш билан таъминлаш масалаларига ҳам тўхталиб ўтилди.
Йиғилишда бош вазир ўринбосарлари, вазирлар, ҳоким ва сектор раҳбарлари ҳисобот берди. Шаҳар ва туман студияларидаги аҳоли билан очиқ мулоқот бўлди.
Бундан аввал Шавкат Мирзиёев паррандачилик билан шуғулланувчи андижонлик тадбиркор аёлни «Меҳнат шуҳрати» ордени билан тақдирлагани, Янги Андижон шаҳрида метро қурилиши мумкинлиги ҳамда Андижонда мураккаб операцияларга муҳтож, эҳтиёжманд аҳолига ёрдам бериш бўйича махсус жамғарма ташкил этилиши ҳақида хабар берилганди.
