«Катта еттилик» (G7) давлатлари раҳбарлари 2022 йилда коронавирус пандемиясига нуқта қўймоқчи. Бу ҳақда Буюк Британияда бўлиб ўтган G7 саммити якунлари бўйича расмий ҳужжатда айтилган, деб ёзади Meduza.
Фото: Reuters
Ушбу мақсадга эришиш учун G7 раҳбарлари келгуси йилда бошқа мамлакатларга миллиард дозада коронавирусга қарши вакцина етказиб беришга келишиб олди.
«2022 йилда пандемияга барҳам бериш учун дунё аҳолисининг камида 60 фоизини эмлаш зарурлигини англаган ҳолда, биз инсонлар ҳаётини сақлаб қолиш учун ўз ҳаракатларимизни кучайтирмоқдамиз», — дейилади ҳужжатда.
Германия канцлери Ангела Меркелнинг аниқлик киритишича, G7 давлатлари ривожланаётган мамлакатлар учун 2022 йил охирига қадар 2,3 миллиард дозада коронавирусга қарши вакциналарни ажратади. Меркелнинг сўзларига кўра, бу ишга Германия ҳам катта ҳисса қўшиб, «350 миллион доза вакцина юборишни ўз зиммасига олади».
Канцлер вакцина ишлаб чиқариш нафақат Европа ёки Осиёда, балки Африкада ҳам глобал бўлиши кераклигини таъкидлади. Унинг сўзларига кўра, Германиянинг BioNTech компанияси бу йўналишда бошқа компаниялар сингари фаол иш олиб бормоқда.
Ҳужжатда G7 раҳбарлари, шунингдек, Россия билан «барқарор ва олдиндан айтиб бўладиган» муносабатларга қизиқиш билдирди ҳамда Россия расмийларини «беқарорлаштирувчи хатти-ҳаракатлар»ни тўхтатишга, ўз ҳудудида кимёвий қурол қўлланилиши юзасидан текширув олиб боришга, фуқаролик жамиятига қарши репрессияларни тўхтатиш ва хакерлик гуруҳларини жавобгарликка тортишга чақирди.
Ҳужжатда, шунингдек, G7 раҳбарлари қуйидагиларга келишиб олди:
- 2050 йилга келиб ўз мамлакатларида углерод чиқиндиларини нол даражагача камайтириш;
- Хитойни, айниқса Шинжон-Уйғур автоном вилояти ва Гонконгда инсон ҳуқуқларини ҳурмат қилишга чақириш;
- Олимпия ва Паралимпия ўйинларини Токиода ўтказилишини қўллаб-қувватлаш.
G7 саммити 11—13 июнь кунлари Англиянинг жануби-ғарбий қисмида жойлашган Карбис-Бей курорт шаҳарчасида бўлиб ўтди. G7 мамлакатлари раҳбарлари икки йил ичида биринчи марта юзма-юз учрашди, чунки пандемия сабабли саммит ўтган йили бекор қилинган эди.
