Футбол бўйича Ўзбекистон миллий терма жамоаси ЖЧ—2022 мусобақаси саралаши доирасида 11 июнь, жума куни Яман термасини мағлубиятга учратди (1:0). Ўзбекистон терма жамоаси бош мураббийи Вадим Абрамов ушбу учрашув ҳақидаги фикрларини билдирди.
Ўйин биз кутгандек қийин кечди. Ҳозир барча ўйинлар шундай бўлишини биламан. Кимдир биз осонгина ғалаба қозонамиз деб ўйлагандир, аммо бундай бўлмаслиги аниқ эди. Яман охирги ўйинида мағлубиятга учрагани ҳеч нимани билдирмайди. Ундан ташқари бу жамоа Саудия Арабистони билан дуранг натижа қайд этган. Биз ўз ўйинимизни қила олмадик, уларга мослашишга ҳаракат қилдик. Албатта, жамоа рақибдан келиб чиқиб ўйин кўрсатади. Энди хулосалар чиқаришимиз лозим. Билишимча, Саудия Арабистонига ҳам осон бўлмаган, 85-дақиқагача ҳисоб очилмаганидан хабарим бор.Ўзбекистон сўнгги тур олдидан 15 очко билан 2-ўринда қолмоқда, жамоа кейинги ўйинни пешқадам Саудия Арабистонига (17) қарши ўтказади.Иқлим билан боғлиқ муаммоларни ҳам ҳисобга олиш керак. Ҳозир ҳаммага қийин. Биз тезроқ ўзимизга келиб, Саудия Арабистонига қарши ўйинга тайёргарлик кўришимиз керак. Ўзимиз хоҳлаган ўйинни кўрсата олмадик. Афсуски, рақибдан келиб чиқиб ўйнашга мажбур бўлдик. Тўп узатишда жуда кўп хатоларга йўл қўйдик. Ўзимизни услубимиздаги футболни кўрсата олмадик. Бизда ўйинни ҳал қилиш учун вазиятлар бўлди. Агар улардан фойдаланганимизда хотиржамроқ ҳаракат қилардик. Лекин рақиб дарвозабони яхши ўйнади.
Футболчилардан хурсандман, шундай ўйинда ҳисобни ушлаб қола олди. Жуда қалтис ҳисоб эди, охирги дақиқалар юқори босим билан ўтди. Аммо вазифани бажардик. Биз Саудия Арабистонига қарши ўйингача хатога йўл қўймасдан етиб боришимиз лозим эди. Энди ўша ўйинга жиддий тайёргарлик кўришимиз керак.
Жалолиддин Машариповнинг сариқ карточкаси? У 90 дақиқа ўйнаши керак эди. Лекин ўз даражасидаги ўйинини намойиш этолмади. Шунга қарамай уни ўйин охиригача майдонда қолдирдик. Унинг ақлли йигит экани ва сариқ карточка олмаслигига ишончим комил эди.
Умарбек Эшмуродов биринчи бўлимда ишончсиз ҳаракат қилди ва жуда ҳаяжонланаётгани сезилди. Шунинг учун иккинчи бўлимда тажрибалироқ бўлган Ашурматовни туширдим ва у ишончлироқ ҳаракат қилди.
Вадим Абрамов, Ўзбекистон терма жамоаси бош мураббийи
Яман — Ўзбекистон учрашуви видеошарҳини бу ерда томоша қилиш мумкин — видео.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)