Қашқадарё вилоятининг Чироқчи туманида ҳоким ваъдасини бажармагани учун аҳоли «Афросиёб» поезди йўлини тўсиб қўйгани ҳақида хабар берилган эди. Мазкур воқеа сабабини ўрганган «Ҳудудий электр тармоқлари» АЖ ахборот хизматининг «Дарё»га маълум қилишича, аҳолининг темир йўлни тўсиб қўйишига электр таъминотидаги чеклов сабаб бўлган.
Маълумки, Чироқчи туманининг Айритом, Пахталисой, Эски Анҳор қишлоқларига 35/10 кВ ли ‘Истиқбол’ нимстанциясидан чиқувчи ‘Ободон’ фидеридан электр таъминоти етказиб берилади. Сўнгги кунларда ҳавонинг кескин исиб кетиши истеъмолчилар томонидан электр энергиясини нафақат маиший эҳтиёжлар, балки томорқаларидаги деҳқончилик экинларини нобуд бўлишидан асраш учун суғориш насосларидан кўпроқ фойдаланишга мажбур қилди. Бу эса, ўз навбатида, 35/10 ‘Истиқбол’ нимстанциясидаги 6300 кВ ли трансформаторнинг зўриқиш билан ишлашига олиб келди. Бундай вазиятда, яъни электр тармоқларининг шикастланиши ва ишдан чиқишининг олдини олишга қаратилган чоралар кўриш мақсадга мувофиқ бўлиб, тезкор диспетчерлик ходимлари томонидан чекловлар киритилган.
Ҳозирги кунда қурилмаларни сақлаб қолиш, шикастланишининг олдини олиш ҳамда истеъмолчиларга узлуксиз электр энергияси етказиб бериш учун ‘Қашқадарё ҳудудий электр тармоқлари’ АЖ ходимлари томонидан 35/10 кВ ли ‘Истиқбол’ нимстанциясига қўшимча 4000 кВ ли трансформатор ўрнатилди ҳамда Айритом, Пахталисой, Эски Анҳор, Шўрбозор, Талоқтепа қишлоқлари истеъмолчиларининг электр таъминоти тўлиқ тикланди.
«Ҳудудий электр тармоқлари» АЖ матбуот хизмати
Эслатиб ўтамиз, Чироқчидаги воқеага тезкор равишда муносабат билдирган «Ўзбекистон темир йўллари» поезд келишидан тахминан 28 дақиқа олдин Чироқчи туман ҳокими Хуррам Жўраевнинг ўзи келиб, темир йўл атрофида йиғилган қишлоқ аҳолисини «Айритом» қишлоқ маҳалла фуқаролар йиғинига олиб кетиб, уларнинг муаммолари ўрганиб, тушунтириш ишлари олиб борганини, «Афросиёб» тезюрар поезди график бўйича ушбу бекатдан соат 10:48 да ўтиб кетганини, ҳеч қандай зарар ёки талафот бўлмаганини маълум қилганди.
