Рақамлар алдамайди: 16 гол билан мундиаллар тарихидаги энг яхши тўпурар. 137 ўйинда 71 та гол билан Германия терма жамоаси тарихидаги энг яхши тўпурар. Ҳужумчининг эришган ютуқлари ҳайратланарли даражада: 2014 йил мундиал ғолиби, ЖЧ—2002 вице-чемпиони, ЖЧ—2006, ЖЧ—2010 бронза медали соҳиби, Евро—2008 вице-чемпиони, «Бавария» билан олтин дублга эришган (2008, 2010), «Лацио» билан Италия Кубогини қўлга киритган (2013). Бу рақамлар «эгаси» — афсонавий ҳужумчи Мирослав Клозе. У 9 июнь санасида 43 ёшни қарши олди. Қуйида унинг фаолиятидаги ёрқин лаҳзалар ҳақида ҳикоя қилинади.
2006 йилги Жаҳон Чемпионатида тўпурар
Клозе 20 ёшигача «Блаубах-Диделкопф» футболчиси сифатида ҳаваскорлар лигасида ўйнаган. 1998 йилда эса «Ҳомбург» сафига ўтган. Орадан бир йил ўтиб, «Кайзерслаутерн» ёш футболчини харид қилади. 2000 йилда эса Бундеслигадаги дебютини ўтказади. Клозенинг дастлабки катта жамоаси «Вердер» бўлиб, бременликлар сафида ҳужумчи 132 ўйинда 63 та гол уради. 2006 йилда эса у Бундеслига ва Жаҳон Чемпионатининг энг яхши тўпурарига айланади. Унинг ортидан Германияда «йил футболчиси»га айланди.
Клозе «Бавария» сафида
Бу воқеаларнинг барчасини «Бавария» кузатиб турарди. 2007 йилнинг ёзида жамоа қайта қуришни амалга ошириши лозим эди. Узоқ давом этган музокаралардан сўнг ҳужумчи Мюнхенда пайдо бўлди. «Жамоамизга келиб қўшилган яна бир футболчини таништирмоқчиман. Тони билан Клозе бизнинг орзудаги ҳужум чизиғимизни ташкил этади» – деди ўша вақтдаги «Бавария» бошқарувчиси Ули Ҳёнесс. Мирослав Клозе ва Лука Тони ҳужум чизиғизда жуфтлик ҳосил қилади. Уларни тўп билан таъминлаш вазифаси яқиндагина жамоага келиб қўшилган Фрэнк Риберига топширилади.
Клозенинг мақсади: совринларни қўлга киритиш
«Кутаётган нарсаларимнинг даражаси юқори эканлигини биламан. Лекин бу менга ҳам боғлиқ жараён» – деб жавоб берди Клозе ўзининг тақдимот маросимида. «Шу кунгача бошқаларнинг соврин ютишларини томоша қилиб келдим. Энди бу лаҳзаларни ўзим ҳам бошдан ўтказмоқчиман! «Бавария»дан бошқа қаерда бунинг имконияти бўлиши мумкин? Мен «Бавария»га ўтиш қарорини ўйлаб ҳам ўтирмадим».
Дастлабки 9 ўйинда 10 та гол
Клозе мавсумни ажойиб бошлади. Ўзининг иккинчи расмий ўйинидаёқ (Германия Кубогида) «Бавария»нинг «Шальке-04» устидан ғалаба қозонишига ёрдам берди. Мирослав учрашувдаги ягона гол муаллифига айланди. Ҳужумчи дастлабки 9 ўйинда 10 та гол урди.
Миро Клозе ва Лука Тони тўпга эгалик қилса, рақиб жарима майдони шунчаки «ёнади».Мюнхендаги биринчи ҳафтадаги натижаларига қараб Ҳёнесс Клозени жамоанинг етакчиларидан бири деб атади.Оттмар Ҳитцфелд
То‘пурар, ассистент, олтин дубль эгаси
Юқорига чиқиш ортидан пастга қулашлар ҳам бўлган. Клозе УЕФА Кубоги ва Германия Кубогида умумий ҳисобда 9 та гол урган, лекин чемпионатнинг қолган қисмида атиги 2 та гол уради. Гол уришдан ташқари шерикларининг голларига ҳаммуаллифлик қиларди. Унинг ҳисобида 11 та голли узатма мавжуд эди. «Мен худбинроқ бўлиш зарурлигини биламан. Лекин жамоадошларимга зарба бериш учун тўп узатиш менинг услубимга хос. Жамоа биринчи ўринда туради. Албатта, кўроқ гол уришни истасам ҳам», — деган эди Клозе.
«Бавария»даги биринчи мавсумида немис ҳужумчиси олтин дублни — Бундеслига ва Германия Кубогини расмийлаштирди.
Клозе иккинчи мавсумда ҳам сермаҳсуллик намойиш этди, аммо…
2008 йилда Юрген Клинсманн «Бавария»нинг бош мураббийига айланди. Германия терма жамоасининг собиқ устози ҳам Мирославга ишонч билдирди. Ҳужумчи 38 ўйиннинг 35 тасида майдонга тушиб 20 та гол ва 10 та голли узатмани ўз ҳисобига ёздириб қўйди. Жароҳати сабаб Мирослав «Бавария»нинг муҳим паллалардаги 8 ўйинини ўтказиб юборди ва жамоасига ёрдам бера олмади. «Бавария» мавсум якунида бирорта совринни қўлга кирита олмади.
Янги мураббий, янги тизим, янги рақобат
Клозенинг олган жароҳати 2009/10 йилги мавсумнинг биринчи қисмида ҳам ўзини намойиш этишга халақит берди. Ундан ташқари жамоага янги мураббий — Луи ван Гал келганди. У ўзи билан янгича тизимни ҳам жамоага олиб кирди. Марио Гомес, Ивица Олич ва Арен Роббен каби янги футболчилар харид қилинди. Мавсумнинг иккинчи қисмида ишлар озгина юришди. 18 та ўйинда майдонга тушган Мирослав 6 та гол муаллифига айланди. Юқори даражадаги ҳужумчи учун бу ёмон натижа эди. Иккинчи дубль ва Чемпионлар Лигаси финалидаги («Интер»га қарши 0:2) иштирок сал кўнгилни хотиржам қилди.
Ўз кучига ишонч билан қайтиш
Клозе 2010 йилги Жаҳон Чемпионатида 4 та гол урди ва бронза медалига эга чиқди. Мирослав Африкадан ўзига ишонч билан қайтди. Ҳужумчи ўз олдига аввалги формасини тиклаш мақсадини қўйди. Аммо яна жароҳат сабаб биринчи давранинг жуда катта қисмини ўтказиб юборди. Иккинчи даврада эса унга жокер роли топширилди. Ўша мавсумда ҳужумчи 6 та гол урди. Мавсум сўнгида эса «Бавария» билан янги шартнома борасида келиша олмади.
Мураббий Клозе
«Бавария» билан ажойиб мавсумларни ўтказдик. Икки марта олтин дублга эришдик. Аммо асосий таркибда майдонга тушмаслик тажрибасини эгалладим. Бу вақт давомида кўп нарсани ўргандим. Мана орадан 4 йил ўтиб, янги йўлга чиқиш қарорига келдим.Мирослав «Бавария» сафида 151 ўйинда 53 та гол урди. Германиядан сўнг Италия унинг кейинги манзилига айланди. «Лацио» билан шартнома имзолаган футболчи 2016 йилда фаолиятини тугатди. Орадан 2 йил ўтиб «Бавария»нинг U-17 жамоасини бошқариш учун Мюнхенга қайтди. Биринчи мавсумидаёқ Клозе жамоасини Жанубий Германия чемпионига айлантирди.Клозенинг «Бавария» билан хайрлашаётган вақтда айтган гаплари
2020/21 йилги мавсумда собиқ футболчи Ҳанс Фликнинг ёрдамчиси лавозимида ишлади. Флик «Бавария»ни тарк этди ва Германия терма жамоасини қабул қилиб олиш арафасида. Мирослав Клозе ҳам мюнхенликларни тарк этди. Ҳозирда у ишсиз ва келган таклифларни ўрганиб чиқяпти. Янги мавсумдан Мирослав Клозени бош мураббий вазифасида кўриш эҳтимоли ҳам мавжуд.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)