FQB qotillar va narkosavdogarlar uchun maxsus dastur ishlab chiqib, ular orasida yashirincha tarqatdi hamda 800 kishini qo‘lga oldi

Dunyodagi 20 ga yaqin davlatning huquq-tartibot organlari xodimlari jinoyatchilikda gumon qilingan 800 dan ortiq odamni hibsga olish bo‘yicha operatsiya o‘tkazdi. Bu haqda Europol saytida keltirilgan ma’lumotlarga tayanib “RBK” xabar berdi.

Xabarda aytilishicha, Trojan Shield deb nomlangan xalqaro operatsiya jinoiy faoliyatga qarshi kurash bo‘yicha eng katta va eng qiyin operatsiyalardan biri bo‘ldi. Unda AQShning Giyohvand moddalarga qarshi kurash boshqarmasi hamda Federal qidiruv byurosi (FQB), Niderlandiya milliy politsiyasi, Shvetsiya politsiya departamenti, Avstraliya Federal politsiyasi va boshqa muassasalar ishtirok etdi.

Europol bayonotiga ko‘ra, so‘nggi kunlarda xavfsizlik kuchlari 16 mamlakatda 700 dan ortiq tintuv o‘tkazdi va yuzlab odamlarni hibsga oldi. Qo‘lga olingan shaxslardan 8 tonnadan ortiq kokain, 22 tonna kannabis va kannabis qatroni, 2 tonna sintetik giyohvand moddalar (amfetamin va metamfetamin) va 6 tonna sintetik giyohvand moddalar prekursori topilgan. Bundan tashqari, huquq-tartibot idoralari tomonidan 250 ta qurol, 55 ta qimmatbaho avtomobil va 48 million dollardan ortiq qiymatdagi turli xil valyuta va kriptovalyutalar musodara qilindi.

Operatsiya 2019-yildan boshlab ishlab chiqilgan. Uning doirasida FQB xodimlari ANOM shifrlangan xabarlarini almashish uchun platforma yaratgan. BBC yozishicha, datur o‘rnatilgan qurilmalar gumonlanuvchilarga yashirincha tarqatilgan, bu politsiyaga ularning narkotik moddalar kontrabandasi, “pul yuvish” va qotillik rejalari haqidagi suhbatlarini kuzatib borish imkonini beradi. Hammasi bo‘lib 12 mingga yaqin moslama tayyorlangan bo‘lib, ular 100 dan ortiq mamlakatlarda jinoyatchilar tomonidan ishlatilgan. Dastur yordamida huquq-tartibot idoralari 27 million xabarni o‘rgangan.

Qayd etilishicha, operatsiya mobaynida Avstraliyada 224 kishi hibsga olingan va oltita yashirin giyohvandlik laboratoriyasi yopilgan, o‘qotar qurol va o‘n millionlab dollar naqd pul musodara qilingan. Niderlandiyada 35 nafar gumonlanuvchi hibsga olingan.

Deutsche Welle xabariga ko‘ra, Frankfurt prokuraturasi butun Germaniya bo‘ylab 70 dan ortiq odam hibsga olingani haqida ma’lum qildi. Huquq-tartibot idoralari 150 joyda tintuv o‘tkazgan, tekshiruv harakatlarining asosiy qismi mamlakatning markaziy qismidagi Gessen federal shtatida bo‘lib o‘tgan.