БМТнинг Озиқ-овқат ва қишлоқ хўжалиги ташкилоти (FAO) ҳамда Глобал экология жамғармасининг (GEF) лойиҳаси доирасида Ўзбекистонда «Ўрмонлойиҳа» лойиҳалаш институти асосида ахборот маркази ва геоахборот тизимлари лабораторияси ташкил этилди. Бу ҳақда «Дарё» мухбири хабар берди.
Мазкур лойиҳа Ўрмон хўжалиги давлат қўмитаси билан биргаликда амалга оширилган. Янги объектлар, ўрмонларни ҳисобга олиш ва мониторинг қилишнинг замонавий тизимига асос бўлади, шунингдек, Ўзбекистоннинг ўрмон хўжаликларини кейинги рақамлаштиришига ёрдам беради.
Ахборот маркази ва GIS-лабораториясининг тантанали очилишида вазирлик ва муассасалар, халқаро ташкилотлар, нодавлат нотижорат ташкилотлар ва ОАВ вакиллари иштирок этган.
Ахборот маркази ўрмонларни барқарор бошқариш мақсадида ахборот хизматларини тақдим этиш йўли билан ахборот сақлаш ва тарқатиш вазифасини бажаради. Ўз навбатида GIS-лабораторияси майдонли (географик) ахборотлар ва зарур объектлардаги улар билан боғлиқ маълумотларни йиғиш, сақлаш, таҳлил қилиш ва график визуаллаштириш учун янги имкониятларни яратиб беради.
Ахборот маркази ва GIS-лабораторияси ўрмон экотизимини таҳлил қилишни такомиллаштириш, йўлдош навигацияси воситаларидан фойдаланиб ўрмон фонди ерларини тўлиқ ҳисоблаш ва мониторинг қилинишини амалга ошириш учун зарур бўлган замонавий жиҳозларга эга бўлган. Ўрмон хўжалиги мутахассисларида ўтқазилган ўрмон дарахтларининг замонавий рўйхатини яратиш ва уни Ўрмон хўжалигининг ягона электрон маълумотлар базасига киритиш имкони пайдо бўлди.
«Энди бизда ўрмон фонди ерларининг ҳолати тўғрисида келиб тушаётган маълумотларни реал вақт режимида ишлаб чиқиш имконияти пайдо бўлди. Буларнинг барчаси ўрмон экотизимининг таҳлил қилинишини яхшилаш, деградация ва чўлга айланиш билан курашиш бўйича ўз вақтида чоралар кўриш, узоқ муддатли ўрмон хўжалик тадбирларини режалаштириш имконини беради», — дейди FAO/GEF’нинг «Ўзбекистоннинг тоғли ва водий ҳудудларида ўрмонларни барқарор бошқариш» лойиҳаси техник координатори Олимжон Қаҳҳоров.
Таъкидланишича, авваллари 2-3 йилда эскириб қоладиган қоғоз хариталарга киритиш йўли билан бир йилда 2-5 та ўрмон ташкилотларини ҳисоблаш амалга оширилган бўлса, эндиликда ўрмон хўжаликларидаги ўзгаришларни реал вақт режимида электрон хариталарга киритиш имкони пайдо бўлган.
Изоҳ (0)