Tashkent City махсус ҳудудми? Нега қурилиши деярли якунланган бинолар ҳамон ҳужжатсиз? Бу саволга АОКАда 9 июнь куни ўтказилган матбуот анжуманида адлия вазири Русланбек Давлетов аниқлик киритди.
Эслатиб ўтамиз, Мурод Назаров «Rost24.uz» сайтига берган интервьюсида Tashkent City ҳудуди махсус ҳудуд бўлиб, у ерда қурилиш ишлари амалга оширилаётган биноларнинг бирортаси тегишли қуйи идораларнинг тасдиғидан ўтмаганини айтганди.
«Агар бу ҳақда бирор-бир тадбиркор субъектив фикрини айтган бўлса, бу унинг ўз фикри. Махсус ҳудудлар ‘Иқтисодий ҳудудлар тўғрисида’ги қонун билан тартибга солинади, масалан, саноат билан боғлиқ эркин иқтисодий зоналар. Бошқа кимнингдир шахсий фикри расмий аҳамиятга эга эмас», — деган Русланбек Давлетов.
Адлия вазирининг таъкидлашича, Tashkent City ҳудудида ер ажратиш масалалари қонуний ҳал этилган. Қурилиш объектини қуришда лозим бўлган ҳужжатлар тури жуда кўп. Улар орасида қурилиш бошланмасдан тайёр бўладигани ҳам, қурилиш жараёни билан параллел тайёрланадиган ҳужжатлар ҳам бор.
«Агар қайсидир қурилиш объектининг тайёр бўлиши керак бўлган ҳужжати ҳамон йўқ эканини аниқ айтадиган бўлсангиз, шунда унга қонуний баҳо бериш мумкин бўлади», — деган у.
Изоҳ (0)